Кеше ел Тәуелсіздігінің 20 жылдығына орай ТМД-ға қатысушы мемлекеттердің құқық қорғау органдары орталық ақпарат қызметі басшыларының кеңесі өтті. Оған Беларусь, Қырғызстан, Молдова, Ресей, Тәжікстан, Өзбекстан және Украина мемлекеттері құқық қорғау органдарының өкілдері қатысты.
Бұл күнде ТМД елдері құқық қорғау органдарының өзара ақпарат алмасуы өте маңызды келісім болып табылады. Өйткені қазіргі халықаралық тығыз ынтымақтастық жағдайы құқық қорғау органдарына да жүйелі байланыста жұмыс істеп, әсіресе қажетті ақпарат алмасуда қарым-қатынастардың заңдылығын реттеудің маңызы зор екендігін көрсетіп отыр. Осы орайда жоғарыда аталған мемлекеттер өкілдері бас қосқан кеңесте «Халықаралық ақпарат банкін қалыптастыруды ұйымдастыру жөніндегі кезекті шаралар мен ақпаратты электронды түрде алмасу» тақырыбы талқыланды. Мұндағы негізгі мақсат өзара ақпарат алмасуда оның пәрменді тетігін жетілдіру үшін шұғыл мәліметтер жеделдігін қамтамасыз ете алатын технологияларды пайдалана отырып, ТМД елдерінің осы заманғы толыққанды ақпараттық-құқықтық кеңістігін жасау болып табылады.
Бұл туралы кеңеске қатысушылар алдында Қазақстан Республикасының Бас Прокуроры Асхат Дауылбаев, Ішкі істер министрі Қалмұханбет Қасымов, Ресей Федерациясы Ішкі істер министрлігінің Бас ақпараттық-талдау орталығының басшысы Павел Важев сөз сөйледі. Олар мұндай оңды қадамның дұрыстығын және ортақ қолжетімді ақпараттық-құқықтық кеңістікті құру әр мемлекеттің талап мүддесінен табылатындығын ортаға салды. Қатысушылар назарына қылмыспен күресті ақпараттық қамтамасыз ету жүйесінің қазақстандық тәжірибесі, ҚР Бас прокуратурасы құқықтық статистика және арнайы есепке алу жөніндегі комитетінің құқық қорғау органдары жұмысының нәтижелілігін көтеруге белсенді ықпал етуге бағытталған инновациялық жобаларының енгізілу барысы ұсынылды.
Александр ТАСБОЛАТОВ.