Ақтөбе өзінің аумағы мен территориялық құрылымы жөнінен республика облыстары арасында ең ірілердің қатарында. Оған Еуропаның шағын 2-3 мемлекеті сыйып кетеді. Өңірдегі ауылдық округтердің де о шеті мен бұл шетіне көз жетпейді.
Су жаңа, жол талғамайтын жүрдек автокөліктер болмаса, ауыл әкімдері өздеріне жүктелген міндеттерді атқаруға үлгере алмай қалуы әбден мүмкін. Осыны ескерген Ақтөбе облысының әкімі Бердібек Сапарбаев жергілікті бюджет есебінен аймақтағы ауыл әкімдеріне «Нива» автокөлігін беру жөнінде шешім қабылдады. Өткен жұма күні оларға жеңіл әрі ауа райының кез келген жағдайында пайдалануға ыңғайлы қызметтік автокөлік кілттері тапсырылды.
Аталған автомобильдер өз елімізде құрастырылған. Сондықтан да бұл игі қадамның екіжақты тигізген шапағаты бар деген орынды. Яғни біріншіден, жоғарыда айтылғандай, осы арқылы облыстағы ауылдық округтің әкімдері сенімді автокөлікке ие болса, екіншіден, мұның өзі отандық тауар өндірушілерді қолдау болып табылады.
Темір ҚҰСАЙЫН,
«Егемен Қазақстан»
АҚТӨБЕ