Үкімет басшысының бірінші орынбасары Асқар Мамин жұмыс сапарымен Қытай Халық Республикасына барды. Сапар аясында А.Мамин бірлескен инвестициялық жобаларды жүзеге асыру мақсатында ірі қаржы, өндіріс, көлік-логистика корпорацияларының басшыларымен екіжақты кездесулер өткізді. Бұл туралы Үкіметтің баспасөз қызметі хабарлады.
– Қазақстан Президенті Н.Назарбаев пен ҚХР Төрағасы Си Цзиньпиннің арқасында екі ел арасында жоғары деңгейдегі ынтымақтастық орнады. «Нұрлы жол» және «Ұлы Жібек жолы экономикалық белдеуі» бағдарламалары Қазақстан мен Қытай арасындағы инвестициялық қарым-қатынастарға жол ашады, –деп атап өтті кездесу барысында А.Мамин.
Премьер-Министрдің бірінші орынбасарының Бейжіңдегі кездесулерінде Export and Import bank of China, China Construction Bank, Industrial and Commercial Bank of China Limited сияқты ірі банктердің басшыларымен инвестициялық жобаларды қаржыландыру мәселелері талқыланды. Сонымен қатар Қазақстан аумағы арқылы транзиттік контейнерлік тасымалдау көлемін ұлғайту, «Қорғас-Шығыс қақпасы» индустриялық хабын дамыту, кеденде жүктерді есептеудің жаңа технологияларын енгізу, сондай-ақ Халықаралық шекара маңы ынтымақтастығы орталығы қызметтерін жетілдіру мәселелері де қаралды.
А.Мамин Ляньюньган қаласының мэрімен осы қаланың порты мен Қорғас бекеті арасындағы бірлескен терминалды дамыту мәселесін талқылады. Сонымен қатар іскерлік кездесулер аясында, «Gener Tec» компаниясымен бірлесіп Қазақстандағы автомобиль құрастыру жұмыстарын дамыту, «China National Building Material Group» компаниясымен бірлесіп шыны зауыты жобасын жүзеге асыру жолдары қарастырылып, мұнай-химия, энергетика, кен өндіру компанияларымен келіссөздер жүргізілді.