Кеншілер астанасындағы Қазтұтынуодағы Қарағанды экономикалық университетінде облыстық Қазақстан халқы Ассамблеясының «National bookdating» акциясы өтті.
«Рухани жаңғыру» бағдарламасы аясында «Қазақ тіліндегі 100 жаңа оқулық» жобасын талқылауға арналған бұл шараға Қазақстан халқы Ассамблеясының, ғылыми-сараптамалық тобының мүшелері, университеттің профессорлық-оқытушылар құрамы және студенттер қатысты.
«National bookdating» акциясы шарасын ашқан ҚЭУ-дің әлеуметтік мәселелер бойынша проректоры, профессор Қосман Әбілов Елбасының «Болашаққа бағдар: рухани жаңғыру» бағдарламалық мақаласының қоғамдық сананы жаңғырту бағытында атқарып келе жатқан шарапатты рөлін атап өтіп, «100 жаңа оқулық» жобасының білім беру ісінде өскелең ұрпақ үшін маңызы зор шаруа екенін айтты. Акция барысында спикерлер аудиторияны әлемдегі ең үздік кітаптардың аудармаларымен таныстырды.
Еске сала кетсек, Н.Назарбаевтың «Болашаққа бағдар: рухани жаңғыру» атты бағдарламалық мақаласының жарияланғанына биыл бір жыл толып отыр. Бағдарлама ішінде «Жаңа гуманитарлық білім. Қазақ тіліндегі 100 жаңа оқулық» жобасы да бар. Осы уақытқа дейін аталған жоба аясында философия, дінтану, антропология және журналистика бойынша 18 кітап пен оқу құралы жарыққа шықты. Әрбір оқулық 10 мың данамен басылып шығып, алдағы бір айдың ішінде жоғары оқу орындары мен кітапханаларға таратылады. Биылдан бастап оқу бағдарламасына да енгізіледі. Сонымен қатар барлық оқулықтардың электронды нұсқалары және соның негізінде әзірленген бейнедәрістер топтамасы Қазақстаннның ашық университеті платформасы (OpenU.kz) арқылы таратылатын болады.
Қайрат ӘБІЛДА,
«Егемен Қазақстан»
ҚАРАҒАНДЫ