Алматы қаласында «Конституция және қоғамдық еркіндік: құқықтық үлгінің қалыптасуы (Қазақстан және Франция тәжірибесінен)» тақырыбымен халықаралық конференция өтті. Оған Конституциялық Кеңестің төрағасы Қ.Мәми қатысты.
Іс-шараны Абай атындағы Қазақ ұлттық педагогикалық университеті, Сорбонна-Қазақстан институты және Францияның Қазақстандағы елшілігі ұйымдастырды. Оның жұмысына Франция елшісі Ф.Мартинэ, осы елден келген сарапшылар, Жоғарғы сот, Жоғары Сот Кеңесі, құқық қорғау органдарының басшылары, сондай-ақ белгілі заңгер-ғалымдар қатысты.
Өзінің құттықтау сөзінде Қ.Мәми: «Демократиялық және құқықтық мемлекетте Конституция жеке бостандық пен қоғамдық қажеттілік арасындағы қарым-қатынас өлшемін айқындайды. Ол бір жағынан адамның бостандығын бекітеді, ал екінші жағынан ерекше қорғалатын конституциялық құндылықтарды қорғаудың тетіктерін білдіреді. Осы мәселеде оларды тиісінше қорғауды қамтамасыз етуге, сондай-ақ құқық үстемдігінің жалпы қабылданған қағидаттарына қол сұқпауға мүмкіндік беретін түрлі әлеуметтік маңызы бар мүдделердің оңтайлы теңгерімін табу қажет. Құқықтар мен бостандықтарды құқықтық реттеу дәрежесі құқық қолданудың сапасы ретінде еліміздің даму деңгейін, халықтың әл-ауқатын көрсетеді, түптеп келгенде мемлекеттің әлемдік рейтингін айқындайды. Адами капитал кез келген мемлекеттің дамуының діңгегі мен қозғалыс факторы болып табылады. Өткен жылы Қазақстан Республикасының Президенті өзара байланысты екі жалпыұлттық жоба – «Рухани жаңғыру» бағдарламасына және конституциялық реформаға бастамашылық жасады. Соңғысы бүкіл құқық қорғау жүйесін одан әрі жаңғырту үшін құқықтық негіз құрды. Адамның құқықтары мен бостандықтары саласында конституциялық заңдылықты қамтамасыз етуде біздің еліміздегі маңызды рөл Конституциялық Кеңеске тиесілі», деді.
Сондай-ақ Конституциялық Кеңес төрағасы қоғамның кемелдену дәрежесі берілген құқықтар мен бостандықтардың көлемімен емес, оларды адамның, қоғамның және мемлекеттің игілігіне қолдана білуімен айқындалады деп атап өтті. Еркін қоғам – адамзат өркениетінің басты жетістіктерінің бірі.
«Осы жылдар ішінде Қазақстан осы идеалға елеулі түрде бағыт алды және сол алған қарқынын жалғастырып келеді», деп түйіндеді Қ.Мәми.
«Егемен-ақпарат»