Орталық коммуникациялар қызметінде өткен баспасөз мәслихатында Ақтөбе облысының әкімі Бердібек Сапарбаев «Рухани жаңғыру» бағдарламасының Ақтөбе облысында жүзеге асырылуының бірінші жылындағы қорытындысын таныстырды.
Жиын барысында аймақ басшысы «Болашаққа бағдар: рухани жаңғыру» атты Елбасының бағдарламалық мақаласы тұрғындар арасында кеңінен насихатталғанын атап өтті.
«Ақтөбеде бір жыл ішінде «Рухани жаңғыру» бағдарламасының материалдық базасы жасалды. Облыс экономикасының дамуы қоғамдық сананың жаңғыруына, халықтың әл-ауқатының артуына оң әсер етті. Негізгі бағыттар «Атамекен», «Тәрбие және білім», «Рухани қазына» және «Ақпарат толқыны» – 4 кіші бағдарламалары бойынша жалпы құны 12,5 млрд теңгеге 89 ірі жоба іске асырылды. Жылдың басты жобасы «Туған жер» республикалық жерлестер форумы деуге болады. Форумға 20 мемлекеттен: АҚШ, Германия, Біріккен Араб Әмірліктері, Ресей, Украина, Армения және Әзербайжаннан барлығы 300-ден астам жерлестер қатысты. Облысымыздың экономикалық дамуына бағытталған 80 млрд теңгені құрайтын 20 меморандумға қол қойылды. «Туған жер» форумына келген жерлес 23 медицина саласының атақты дәрігерлері 29-дан аса күрделі операция жасап, 1500 медицина қызметкерін қамтитын 14 семинар өткізді. Форум аясында «Туған жерге тағзым» акциясы жүзеге асырылды. Құтты мекен – Ақтөбеде жалпы құны 5,7 млрд теңге тұратын 614 әлеуметтік жоба жүзеге асырылды. Жерлестердің қолдауымен 28 сквер мен парк құрылысы (300 млн) салынды, әлеуметтік нысандар жөнделді, елді мекендердің инфрақұрылымдары жақсартылды. Биыл «Туған жерге тағзым» акциясы өз жалғасын табады. Өңірде жалпы құны 2 млрд 750 млн теңгеге 648 жоба жүзеге асырылады. Елімізде тұңғыш рет Ақтөбе облысында «Аналарға тағзым» рухани-тәрбие беру орталығының құрылысы басталды. Бұл жоба шетелдерде және республика көлемінде тұрып жатқан жерлестеріміз – ақтөбеліктердің қолдауымен жүзеге асырылуда», деді ол.
Сонымен қатар аймақ басшысы балалардың шығармашылық қабілетін дамытуды, функциялық сауаттылығын арттыруды, дарындылығын анықтауды, басқарушылық қасиетін дамытуды, кәсіпкерлікке бейімдеуді, мамандық таңдауына жол ашуды көздейтін құны 1,5 млрд теңге тұратын «Шығармашылық академиясы» салынғанын тілге тиек етті.
«Бүгінгі күні Шығармашылық академиясы 7 бағытта 45 үйірме ашып, 5000-нан астам жасөспірімді тәрбиелеуде. Бизнестің әлеуметтік жауапкершілігі аясында құны 1,5 млрд теңге тұратын 720 орындық «Жекпе-жек» спорт сарайы салынды. Бүгінгі күні мұнда халықаралық және республикалық дәрежедегі спорттық жарыстар өткізілуде. Ақтөбеде алғаш рет құны 480 млн теңге тұратын Хоккей модулінің құрылысы салынды. Спорт кешенінде 800-ге жуық бала мәнерлеп сырғанаумен, шорт-трекпен, хоккеймен тегін айналысуға мүмкіндік алды. «Сәби» қайырымдылық қорының қаржысына құны 1,4 млрд теңге тұратын «Мейірім» әлеуметтік бейімдеу жастар орталығы салынды, 111 тәрбиеленуші тұрып жатыр. Жетім, ата-анасының қарауынсыз қалған балаларға ерекше қамқорлық жасалды. Бүгінгі күні 945 балаға жергілікті кәсіпкерлер тарапынан қамқоршылар бекітіліп, олардың Тұрғын үй құрылыс жинақ банкіндегі есеп шоттары 210 млн теңгеге толықтырылды. Сонымен қатар словак инвесторларымен бірлесіп, 3,8 млрд теңгені құрайтын 2500 орындық «Мұзайдыны» спорт кешені салынып жатыр. Халықаралық дәрежеге сай келетін құны 1,5 млрд теңгеге Теннис орталығы, көлемі 8,5 мың шаршы метр болатын «Жеңіл атлетика манежі» халық игілігіне ұсынылады. Жерлестердің қолдауымен қала және аудандарда құны 348 млн теңгеге 53 спорт, воркаут, шағын футбол алаңдары және хоккей корттары салынды. Сонымен қатар «Мен – ақтөбелікпін!» өңірлік жастар жобасы іске асырылады. Жоба аясында 8 бағыт бойынша жұмыс жүргізіледі. Қытай Халық Республикасы, Ресей Федерациясының Мәскеу, Орынбор, Қазан қалаларында, еліміздің Астана, Алматы, Орал, Қарағанды, т.б. қалаларында оқитын ақтөбелік жастармен кездесу өтеді. Жастарға Ақтөбеде еңбек етуге, облысымыздың дамуына үлес қосуларына жағдай жасалады», деді Б.Сапарбаев.
Баспасөз мәслихаты барысында облыс әкімі Мемлекет басшысының 5 әлеуметтік бастамасына да тоқталып, осы орайда атқарылып жатқан мәселелерді тілге тиек етті.
«Парламенттің бірлескен отырысында Елбасы халыққа 5 жаңа әлеуметтік бастамасын жариялады. Бірінші бастама: «Әрбір отбасына баспана алудың жаңа мүмкіндіктерін беру». Ағымдағы жылы біз 870 мың шаршы метр немесе кем дегенде 8 мың пәтер салуды ауқымды міндет ретінде қойдық. Алайда, Елбасы айтқандай, бұл әлі жеткіліксіз. «7 – 20 – 25» бастамалық бағдарламасы осы мәселені шешуге оң әсер етеді. Ағымдағы жылдың соңына дейін өңір экономикасының өсімін кем дегенде 5 пайызға өсіру жұмыстары жалғасатын болады», деді Ақтөбе облысының әкімі.
Рауан ҚАЙДАР, «Егемен Қазақстан»