Айгүл Досмағамбетова тұлымшағы желбіреген күннен өнерге құмар болып өсті. Мектеп қабырғасында оқып жүргенде музыкалық студияда фортепьяно класы бойынша білім алды. Бағдарламадан тыс музыкалық үйірмелерге қатыса жүріп, қолы қалт еткен сәттерде пианино кабинетіне қарай тұра жүгіретін. Оңашада музыка әлемінің небір тұңғиық сырларына беріліп, ой саяхатын кешкенді ұнататын. Сондай сәттерде бойын әлдебір сезім шарпып, тыным бермейтін. Сөйтсе, шабыт ұшқындары екен ғой.
Мектеп бітірген соң көп ойланған жоқ. Бірден П.И.Чайковский атындағы музыкалық колледжге тартты. Сосын Құрманғазы атындағы Алматы мемлекеттік консерваториясының хор дирижері класын бітірді. Базарғали Жаманбаев, Анатолий Молодов, Виталий Орленин, Тамара Алибакиева, Қорлан Мусина секілді білікті профессорлар мен кәсіби мамандардан тәлім алып, домбыраның қос шегі іспеттес теориялық білім мен тәжірибеге қатар шыңдалып шықты. Содан бері өмірі жас балғындардан ажыраған емес. Алға қойған арман-мақсат адамға бірден жеткізе қоюшы ма еді. Алыстан мұнарланған алдамшы сағым құсап, оның бұралаң жолдары көп болатынын Айгүл алғашқыда албырттықпен байқамапты. Алматыдағы жылы тұрағын отбасымен Көкшетау қаласына айырбастап, тәуекелге бел бууы сондықтан еді. Теріскейдегі жер жаннатына келіп еді, екінші тынысы ашылып сала бергендей болды. Халқымыздың баға жетпес асыл мұраларын насихаттау, салт-дәстүрлерімізді жан-жақты дәріптеу шараларына белсене кірісіп кетті. Жеткіншектерге арнап әндер жазып, өңдеп, бірнеше диск жинағын шығарып үлгерді.
Қызығы мен шыжығы қатар жүретін тынымсыз еңбектің қадір-қасиетін ұғынғанға не жетсін! «Звоночек» балалар бақшасындағы жас қайыңдай желкілдеп өсіп келе жатқан бір топ бүлдіршіндердің басын қосып, домбыра тобын ұйымдастырған болатын. Сол кездегі көңілдегі қобалжуды айтып жеткізу қиын. Небір секемшіл ойлар көңіл түкпіріне қамалып, жанын жегідей жеген күндер құрсаулап алды. Қалалық байқауда оның жетекшілігіндегі домбырашылар бірінші орынды жеңіп алғанда сенер-сенбесін білмей қатты толқығаны рас. Іле-шала ол баптаған гуманитарлық-техникалық лицейдің ұл-қыздарынан құралған домбырашылар ансамблі «Қазағымның үні сенсің, домбыра!» атты конкурста лауреат атанғанда бойында өзіне деген үлкен сенім орнықты. Маңдай тердің өтеуі деген осы! Қуаныш құшағынан айыға алмай жүргенде Астана қаласындағы №1 музыкалық балалар мектебінен алғыс хат алды. Онда оның басқаруындағы «Өлең» музыка-баспа студиясына жылы лебіз арналған екен. Жеткіншектерді өнерге баулып, авторлық әндер жазғаны, өңдеп, жинақ шығарғаны үшін шығармашылық сәттілік тілепті. «Жақсы сөз – жарым ырыс», деген. Танып-білмейтін ұжымның өзіне жолдаған ыстық ықыласы қанат бітірді.
Айгүлге жеке студия ашу оңай болған жоқ.Талай қиындықтарға кезікті. Алғашқы кездері дыбысты жазып, өңдейтін техникалық құрал-жабдықтар оңайлықпен таптыра қоймады. Бірақ қайсар мінезі, алға қойған мақсаткерлігі арқасында кесе-көлденең тұрған кедергілерді жеңіп шықты. Бүгінде студияның ән дискілеріне сұраныс өте көп. Балабақшалардан, мектептерден тапсырыс үзбей түсіп жатады. Ол қазір әнмен қоса домбыра класына да сабақ береді. Осы үшін филармониядан және қазақ музыкалық комедия театрынан жұмыстан шығып, балабақша мен мектепке орналасты. Оның бала кезгі арманы осылай орындалды. Жас бүлдіршіндерді қазақтың қасиетті домбырасының тылсым сырына баулу үшін өзі де тартуды бір кісідей меңгеріп алды.
Айгүл Қайыржанқызы өзінің педагогикалық қызметінде әркез шетелдік озық тәжірибелерге де сүйеніп отырады. Мәселен, Мария Монтессоридің алдымен жазу, сосын оқу деген үлгісіне ден қойса, Вальдорфтың шығармашылық еркіндігі қатты қызықтырады. Ал, Селестена Френенің балаларға үлкендерше қарау, өзара қарым-қатынастағы сыйласымдылық ұстанымы тәнті етеді. Осындай үлгі аларлық тағылымдарды ой елегінен өткізе келіп, өзінің жеке тәжірибесінде шығармашылық, ойлау дағдысын қалыптастыруға күш салады.
Сазгерлік оның бойына бақ болып қонған. Соңғы кездері дискілерді мемлекеттік тілде шығаруды үрдіске айналдыра бастады. Ол құрастырған дискілер мен әндердің балабақша ертеңгіліктерінде, түрлі концерттерде шырқалмаған кезі жоқ. Театрландырылған ертегілер жазылған дискілермен тұтас дыбыстық спектакльдер шығару да өз жемісін беріп келеді. Мәселен, таяуда «Тыңдаймыз, сурет саламыз, ойлауды дамытамыз» сериясы аясында оның қазақ ертегісінің желісімен жасаған «Ботақан» дискісі бүлдіршіндер қолына тиді.
Қазір студия қызметкерлері Айгүлдің жетекшілігімен жаңажылдық диск әзірлеуге кірісіп кеткен. Ол инновациялық технология негізінде жасалып, «Әлемдік классиканың бейнеколлекциясы» деген сериалмен таралатын болады. Онда қазақ, орыс және шетел музыкаларының антологиясы топтастырылып, жергілікті композиторлардың әндері мен орындаушыларына басымдық беріледі. Айгүл Досмағамбетова 3D форматтағы жаңа мультфильмдер түсіру қажет деп санайды. Ол өзінің аудиертегілерге ән жазу тәжірибесіне сүйене отырып мультфильм жасаушылармен тығыз әріптестік байланыс орнатқан.
Осылайша, сазгердің сырлы әлемі өнердің небір түрлерімен тоғысып, бүгінгі уақыт тынысын бейнелеп жатқаны анық аңғарылады.
Өмір ЕСҚАЛИ,
Көкшетау.