Осындай жалынды ұранмен облыс орталығындағы «Астана» мұз сарайында «Тәуелсіздіктің 20 шыңы – 20 жұлдызды күн» жобасы шеңберінде «Болашақ өз қолымызда!» атты жастар форумы болып өтті.
Тәуелсіздік құрдастарына құрмет көрсетілді. Сонымен бірге, елімізде құрылған бірлестіктер, балалар мен жасөспірімдердің «Жас ұлан» ұйымына алғашқы рет салтанатты қабылдау рәсімі өткізілді. Форумға облыс әкімі Бақытжан Сағынтаев қатысып, жастарға тілек білдірді. Мұз айдыны алаңына еліміздің намысын талай байрақты бәсекелерде абыроймен қорғап жүрген спортшылар шықты.
Бұдан кейін мерекелік шеруді ғылым, білім, өнер салаларының үздіктері жалғастырды. Облыс жастары, мектеп оқушылары халықаралық олимпиадаларда 17 алтын, 26 күміс, 23 қола медальдарды жеңіп алды. Өнерлі Мария Мудряктың орны бөлек. Бұл ретте, жиналғандар назарына Италияның Ла Скала академиясының студенті М.Мудряктың құрлық асып жеткен бейнесәлемдемесі тікелей эфир арқылы берілді. «Біз тәуелсіз, жас мемлекетімізбен қашанда мақтануымыз қажет. Еліміздің жетістіктерін көргенде бойымды туған еліме, жеріме деген ерекше қуаныш сезімі билейді. Осы ретте, жастардың қанатын шыңдап, қолдау көрсетіп, арманымыздың орындалуына мүмкіндік жасап отырған Елбасына алғысымды білдіремін. Өзіме артылған сенімді ақтаймын. Себебі, мен – қазақстандықпын!», – деді өз сәлемдемесінде Маша.
Сондай-ақ, шара барысында «Дипломмен – ауылға!», «Ауылдың гүлденуі – Қазақстанның гүлденуі!» сияқты бағдарламалардың орындалу барысы, студенттік құрылыс және жастар жасақтарының үшінші еңбек маусымының қорытындылар шығарылды. «Жасыл ел» еңбек жасақтарының командирлері, белсенділері облыс әкімінің атынан бағалы сыйлықтармен марапатталды. Еңбек жасағының үздік сарбазы «Нива» автокөлігіне ие болды. Форум соңында «Ұлытау», «Орда» топтары мен жерлестеріміз Ринат Малцагов пен Жанар Доғалова өнер көрсетті.
Фарида БЫҚАЙ,
Павлодар.