Тәуелсіздік орнап, экономикамыз өркендеп, өміріміз мәнді де сәнді бола түсуде. Бұл орайда, түрлі салада да айтарлықтай жұмыс атқарылып жатыр. Алар асу әлі алда. Қаржы саясатын бұлжытпай орындау да маңызды.
Қазақстан Республикасының Президенті Н.Ә.Назарбаев Қазақстан халқына арнаған биылғы Жолдауында: «Салық және кеден саясатын реформалау күллі экономикалық жаңару саясатының маңызды құралы болуы керек және экономикамыздың жаңа салаларын әртараптандыру мен дамытуды ынталандыру арқылы, бұл салаларға шетел капиталын тарту мақсатында икемді салық және бюджет саясатын пайдалану маңызды» − деп атап көрсетілді.
Еліміздің Тәуелсіздігінің 20 жылдығына орай және салық саясатындағы жүзеге асырып жатқан іс-шараларын насихаттау, салық төлеушілердің арасында «салық мәдениетін» қалыптастыру, әрбір тұлғаның салық төлеуге деген азаматтық борышын арттыруда Астана қаласының Ұлттық академиялық кітапханасында «Қазақстан Республикасының салық саясаты» тақырыбында «Тұран-Астана» университетінің аға оқытушысы, экономика ғылымдарының кандидаты, «Салық және салық салу» оқулығының авторы Ғалымжан Керімбек тағылымды дәріс оқыды.
Кітапхана оқырмандары мен «Тұран-Астана» университетінің, Л.Н. Гумилев атындағы Еуразия ұлттық университетінің, С.Сейфуллин атындағы Қазақ аграрлық-техникалық университетінің және тағы басқа оқу орындарының студенттері көтерілген мәселені кеңінен талқылауға өз үлестерін қосты. Аталған оқу орындарынан дәріске қатысқан оқытушы-ғалымдар жалпы дәріс және «Салық және салық салу» оқулығы бойынша өз көзқарастарын білдірді. Жалпы алғанда бұл жиын тәлімді болды.
Сапия ТӘЖІКЕНОВА, «Тұран-Астана» университеті экономикалық пәндер кафедрасының меңгерушісі, экономика ғылымдарының кандидаты.