Жаңа кәсіпорындар іске қосылып жатады, ол біздің еліміз үшін таңсық емес. Ал бұл зауыттың орны бөлегірек. Ол – мемлекеттің қаржылық қолдауымен, 2010-2014 жылдарға арналған үдемелі индустриялық-инновациялық даму жөніндегі мемлекеттік бағдарламаның бірінші бағыты аясында салынған кәсіпорын. Бұл жоба Қазақстанды индустрияландыру бағдарламасына енген.
Зауыт «Алматы қатталған құбырлар зауыты – АҚҚЗ» («ПВХ Дайбленд» ЖШС) деп аталады. Ол алдын-ала қапталған құбырлар мен фасондық бұйымдар шығарып, оны жеткізіп берумен айналысады. Жылуды ұстайтын қаптамалар пенополиуретаннан жасалады. Алдын-ала қапталған құбырлар жер астында жылу жүйелерін каналсыз төсеу үшін пайдаланылады. Ал жылу жеткізгіштердің параметрлері мынадай есепке құрылған: жұмыс қысымы 1,6 Мпа және пайдаланылатын суықтық температурасы 140°С-ке дейін.
Мұндай қалыптағы құбырлар Алматы қаласы үшін өте қажет. Ол жаңадан салынып жатқан құрылыстарда, сондай-ақ коммуникацияларды алмастыруда кеңінен пайдаланылады. Бұл өнімдер өзінің сапалылығымен ерекшеленеді.
Зауыттың қуаты да айтарлықтай. Әзірге ол Алматыдай мегаполистің қажетін толық өтей алады. Болашақта оның өнімдері басқа аймақтарға да жіберілуі мүмкін. Зауыт бір тәулікте диаметрі 32-1020 мм. аралығында жылу ұстағыш пенополиуретанмен қапталған 675 қума метр құбыр, сондай-ақ 50-120 фасондық бұйым шығара алады. Фасондық бұйымдардың түрі көп: қозғалмайтын және жылжымалы тіреулер, құбырларды жалғастыратын, бөлетін түтіктер, тағы басқа өнімдер жылу жүйелерін жүргізуде таптырмайды. Жаңа зауыт сондай мұқтаждықтан құтқарады.
Бұл зауыттың құрылысы үдемелі индустриялық-инновациялық даму жөніндегі мемлекеттік бағдарламаға еніп отырғаны тектен-тек емес. Оның өнімдері қала құрылысының қарқынына, коммуникация жүйесін жақсартуға айрықша ықпал ететін болады.
Реті келгенде жалпы Алматы қаласында үдемелі индустриялық-инновациялық даму бағдарламасы бойынша кең ауқымды жұмыс жүргізіліп жатқанын айтқанымыз жөн болар. Қазір жалпы сомасы 257,5 миллиард теңгені құрайтын 28 индустриялық жоба бойынша жоспарлы іс атқарылып жатыр. Өткен жылы төрт жоба жүзеге асты. Ол өмірдің әр саласын қамтиды. Гемодиализ (жасанды бүйрек) үшін ерітінді шығаратын «Бирунифарм» ЖШС, «Медеу-Шымбұлақ» тау-шаңғысы курорты, қатты және сұйық заттар шығаратын «Нобел АФФ» АҚ, «Талес Казахстан Инжиниринг» ЖШС тактикалық буыны радиобайланысының құралдарын өндіру жобасы Алматы қаласындағы айтулы нысандар қатарын толықтырады.
Үстіміздегі жылдың алғашқы жартысында 3,5 миллиард теңге қаржы жұмсалған үш жоба жүзеге асты. «Обис» компаниясы деп аталатын ЖШС шырынды ішімдіктер шығарады. Құрғақ құрылыс қосындылар зауытын қайта құру арқылы «Шебермикс» ЖШС пайда болды. «Алматы ашытқы зауыты» АҚ қатарға қосылды.
Қазір қалада жалпы көлемі 167,1 миллиард теңге құрайтын төрт жоба пайдалануға беріліп жатыр. Оның қатарында Алматы метросының бірінші кезегі бар.
Мамадияр ЖАҚЫП.