Кеше Швейцарияның Ньон қаласында футболдан Еуропа лигасы 2018/2019 маусымының бірінші кезеңінің жеребесі тартылды. Биылғы Еурододаның бірінші іріктеу кезеңінде Қазақстанның үш бірдей клубы сынға түседі. Олар – Алматының «Қайрат», Павлодардың «Ертіс» және Қостанайдың «Тобыл» клубтары.
Жеребе тарту рәсімінің қорытындысы бойынша «Қайрат» клубы бірінші кезеңде «Энгордани» (Андорра) және «Фольгоре» (Сан-Марино) командалары арасындағы жеңімпаз клубпен кездесетін болды. «Ертіс» командасы Эстонияның «Нарва» (Эстония) клубымен келесі кезеңге жолдаманы сарапқа салса, «Тобыл» Грузияның «Самтредия» (Грузия) командасымен ойнайды.
Еуропа лигасының іріктеу кезеңіндегі алғашқы ойындар 12 шілде күні өтсе, жауап матчтары 19 шілдеге белгіленген. Қазақстандық командалар алғашқы ойындарын сырт алаңда өткізеді. Жеңімпаз атанған клубтар іріктеуді жалғастырады. Ал жеңілген команда Еуродода бәсекесін аяқтайды.
Дайындаған Әли БИТӨРЕ,
«Егемен Қазақстан»