Елбасы оңтүстікке келген сапарында әлемдік дағдарыс жағдайында сан мыңдаған адамдар жұмыс жасайтын алып концерндердің қайраңдап қалған кемелердей хал кешкенін айтқан. Ал шағын және орта кәсіпке бағытталған Германия дағдарысты айтарлықтай сезіне қоймаған.
Сондықтан, Қазақстанның негізгі арқа тірері шағын және орта кәсіп болады дегенді аңғартқан еді.
Алайда, бірін екі етіп, кәсіп ашқан, кетпен шапқан, мал баққан ағайынға қызметін пайдаланып жолын баққандар, оңайдан олжа іздеп, шибөрідей талайтындар жетіп артылады. Ондайда кәсіпкерлердің сая табары құқық қорғау органдары, оның ішінде қаржы полициясы.
Біз Тәуелсіздік мерекесі қарсаңында Оңтүстік Қазақстан облысы бойынша экономикалық қылмысқа және сыбайлас жемқорлыққа қарсы күрес департаментінің бастығы, полковник Нұрлан Қамбатыровқа жолығып, сауалдарымызға жауап алған едік.
– Қаржы полициясының Елбасы саралаған негізгі міндеттерінің бірі – отандық кәсіпкерлікті қолдау, – дейді полковник. Шағын және орта кәсіптің өркендеуіне қысымды болдырмау мақсатында жергілікті кәсіпкерлермен тұрақты кездесіп, екі жақты байланыс орнатудамыз.
Кәсіпкерлікті тексеруге мораторий жарияланғанын құп көргенімізбен халық денсаулығына нұқсан келтіретін дәрі-дәрмектер, азық-түлік, спирттік ішімдіктердің заңсыз айналымына бақылау жүргізіледі. Мемлекетті алдап, пайда табатындардың адымы қысқа, оған жол бермейміз. Департамент пен «Атамекен Одағы» ұлттық экономикалық палатасы, «Оңтүстік Қазақстан облысы кәсіпкерлері мен жұмыс берушілер» одағымен өзара меморандум қабылданған. Әр аптаның сәрсенбісі кәсіпкерлер күні деп белгіленген. Бұл күні кез келген кәсіпкердің департамент бастығының қабылдауында болып, шағымын айтуына мүмкіндігі бар. Департамент қызметкерлері ондайда кәсіпкерліктің адымына тұсау салғысы келетіндермен ымыраға келмейді.
Осылай деген департамент бастығы “Тәуелсіздікті баянды ету – барша қазақстандықтардың мұраты. Біз де осы торқалы тойға өз сүбелі үлесімізді қосып келеміз” деді.
Расында, экономикалық қылмысқа қарсы күресетін департаменттің мемлекетке орасан көмегі барын бірер фактілермен түйіп айтуға болады. Мәселен, 2007 жылы ғана жұмысқа қабылданған қаржы полициясының капитаны Қанат Аблақанов өз іскерлігінің нәтижесінде 1 млрд.-тан астам қаржыны мемлекет пайдасына қайтарған. Әрбір қызметкер өз ісіне мұқият қарап, мемлекет пайдасына жұмыс істейтін болса, оның өзі Тәуелсіздікті тұғырлы етуге қосқан үлес болып саналатыны анық.
Бақтияр ТАЙЖАН,
Оңтүстік Қазақстан облысы.