Толассыз жауған жаңбыр мен су тасқыны, лай көшкіні салдарынан Жапонияда қаза тапқандар саны 204 адамға жетті, деп хабарлайды елдің бас полиция басқармасы.
Бұл – кейінгі он жылда болған ең қайғылы апатқа айналып отыр. Әсіресе, Окаяама, Хирошима және Яамагучи аймақтары орасан залалға ұшыраған.
Айта кету керек, соңғы рет су тасқынынан мұншалықты көп адам 1982 жылы қаза тапқан болатын. Төтенше апаттан зардап шеккендерді құтқару жұмысына 75 мыңнан астам адам жұмылдырылған. Олардың қатарында өрт сөндірушілер, әскерилер де бар. Тіпті, Жапонияның премьер-министрі Синдзо Абе де шет елге іссапарын кейінге қалдырып, тасқынның салдарымен күресуге бел шеше кірісіп кетті.
BBC арнасының хабарлауынша, тасқын болған аумақтарда жауын әдеттегіден бірнеше есе көп жауған. Сондықтан тасқын су бой бермей, талай жанның өмірін жалмаған көрінеді.