Арқа төсін дүбірлеткен Астана тойы әлі де тарқай қоймағандай. Қоғамдық даму министрлігінің Жастар саясаты департаменті республикалық жастар ұйымдарымен бірлесіп елорда арбатында «Жан жүрегім – Астана!» атты жастар шығармашылық фестивалін өткізуі соның дәлелі болса керек.
Фестиваль аясында Астана қаласының 20 жылдық мерекесіне арналған бұқаралық-мәдени іс-шаралар ашық аспан астында ерекше көтеріңкі көңіл күйде өтті. Автошеру флешмобы, шахмат бойынша блиц-турнир, күй-шеру, жастар арасында гитарада танымал әндерді орындау, қолөнершілер бұйымдарының көрмесі сынды түрлі жанрдағы қызықты шаралар жастардың көтеріңкі көңіл күйімен мереке сәнін онан сайын арттыра түсті.
Аталған іс-шараға Қоғамдық даму министрі Дархан Кәлетаев және Астана қаласы әкімінің орынбасары Ермек Аманшаев қатысып жастардың жарқын бастамасына қолдау көрсетті. Игі істен еліміздің эстрада әншілері де сырт қалмаған. Қыдырәлі Болманов, Қарақат Әбілдина бастап, Қанат Үмбетов, ағайынды Жүгінісовтер қостаған басқа да әншілер ән салып фестиваль көрігін қыздырды.
«Фестиваль өткізудегі мақсат – жастардың азаматтық және шығармашылық белсенділігін арттыру болып табылады. 20 жыл ішінде елорда жастардың қаласына айналды. Бүгінгі елордада жастардың қатысуымен аса көп қаржылық шығынсыз ауқымды және жаппай іс-шараларды өткізу үшін барлық жағдайлар мен мүмкіндіктер жасалаған. Бүгінгі «Жан жүрегім – Астана!» жастар шығармашылық фестивалі осының дәлелі», дейді Қоғамдық даму министрлігінің Жастар саясаты департаментінің басшысы Асхат Оралов.
Аталмыш шара республикалық жастар ұйымдарының бастамасы бойынша ұйымдастырылған. Атап айтқанда, «Қазақстан жастар конгресі», «Жасыл ел», «Жас ұлан», ұйымдары, «Қазақстан КВН одағы», РМК «Ұлттық Дельфий комитеті» ҚҚ, «Қазақстан студенттерінің альянсы» ҚҚ, сондай-ақ Қазақстан Республикасы Президентінің «Болашақ» халықаралық стипендиясы стипендианттарының қауымдастығы қолдау көрсеткен.
Ұларбек НҰРҒАЛЫМҰЛЫ, «Егемен Қазақстан»