Мұғалжар ауданындағы Ембі қаласына газ құбырын тарту бұдан бес жыл бұрын басталған-ды. Қаржы жағдайына байланысты бір ғана газ бөлу пункті іске қосылып, осындағы бірнеше әлеуметтік нысандар ғана көгілдір отын игілігін көріп келген-ді. Газ құбыры қалаға келгенімен тұрғын үйлерге толықтай көгілдір отын берудің сәті Тәуелсіздіктің 20 жылдығы қарсаңында ғана түсті. Ембі қаласына газ бөлу жүйесін жүргізуге және Жем қаласына газ құбырын тартуға облыстық бюджеттен 370,2 миллион теңге қаржы бөлініп, ол толық игерілді. Қолсозым жерге келіп тұрған көгілдір отынға көздерін сатқан ембіліктердің қуанышында шек жоқ. Қала бойынша салынған 12 газ бөлу пункттері құрылысы аяқталып, енді тұрғын үйлерге кіргізу жұмыстары қарқынды жүргізіліп жатыр. Ембі қаласына көгілдір отын беру салтанатына қалалықтар тайлы-тұяғы қалмай жиналды. «Сабақты ине сәтімен» дегендей мұндай қуаныштың ел Тәуелсіздігінің 20 жылдық мерейтойымен тұспа-тұс келуін жақсылыққа балап жатты олар. Осы салтанатты шараға арнайы атбасын тіреген облыс әкімі Архимед Мұхамбетов жиналғандарды қуанышты сәтпен құттықтай келіп, Елбасы Нұрсұлтан Назарбаевтың дана да көрегендік саясатының арқасында еліміздің экономикалық-саяси жүйесін қалыптастыруда елеулі дамуға қол жеткеніне, тәуелсіздіктің 20 жылы ішінде халықтың әл-ауқатын жақсарту бағытында қыруар жұмыстар атқарылғанына тоқталды.
Салтантты сәтте сөз алған еңбек ардагері Ғайбол Исаев, қалалық жастар ұйымының мүшесі Орынгүл Бөкеева және басқалар осындай игілікті іс үшін Елбасына және облыс басшылығына ризашылықтарын білдірді.
Халық риза болса, риза болғандай шаруа тындырылды. Қаладағы 3214 үйдің тұрғындары енді қолдарын жылы суға малып отыратын болды. Тұрғындар тонналап қымбат көмір түсіруден, бұрқыратып күл шығарудан құтылды. Қазірдің өзінде 370 үй және 17 әлеуметтік және өндірістік нысан көгілдір отынның қызығын көріп отыр. Газ бөлу пункттерінің құрылыс жұмыстарын жүргізген «МКСтрой Сервис» ЖШС-іне де халықтың алғысы шексіз. Өңір басшысы қала тұрғыны Еділ Ахметовтің үйіне кіріп, газдың игілігін көріп отырғанына көз жеткізді.
Содан кейін облыс әкімі Архимед Мұхамбетов осындағы «Нұр» мешітінің тұсаукесеріне қатысты. Жаңа мешіттің ашылуына жиналған жамағатты имандылық үйінің пайдалануға берілуімен құттықтаған әкім исламның бірліктің, татулықтың діні екеніне тоқталды, жастарды имандылыққа тәрбиелеуге шақырды. Мешіт имамы Әділжан Бекбауовқа жеңіл автокөліктің кілтін ұстатты. Мешітте бір мезгілде 400 адам намазға тұра алады. Мұнда намаз оқитын, сауат ашу бөлмелері бар. Ғимаратқа жылу, су, электр және кәріз жүйесі жүргізілген. Қос бірдей қуанышқа бөленген ембіліктер көңілдері көтеріңкі, жүздері жарқын.
Сатыбалды СӘУІРБАЙ.
Ақтөбе облысы.