Мен бұдан 25 жыл бұрын мектеп бітірген ұрпақтың өкілімін. Сол кездегі саясаттың дүмпуін бір кісідей білемін. Әскерге барғанда Желтоқсан оқиғасының ызғарын сезіндік. Еліміз тәуелсіздік алған сәтте алдымен қуанған қазақтың бірі едім. Содан бері еліміздің өркендеуіне, ішкі-сыртқы экономикалық байланыстың терең тамыр жаюына іштей тілекші болып жүрген жанмын. Алайда, кеше, ел Тәуелсіздігінің 20 жылдық мерейтойы тойланар сәтте Маңғыстау өңірінде орын алған тосын оқиға алаңдатып-ақ тастады.
Менің атам халқымыздың ауыз әдебиетін жақсы білетін. Халық арасында кең тараған ақындардың, жыршылардың өлең-жырларын жатқа айтатын. Өзі де әдебиетке өте жақын болды. Суырыпсалмалық өнері бар еді. Сол өнерін бізге дарытуға көп жұмыстанды. Немерелерімен, яғни, бізбен әңгіме-дүкен құрғанда ұдайы елдікті, Қазақстанды мекен еткен ұлттар арасындағы бірлікті насихаттап отырушы еді. Біз одан алдағы өмірімізге мол тәлім-тәрбие алдық. Оны өзіміздің күнделікті тіршілігімізде ұдайы есте ұстап отырамыз. Мұны айтып отырған себебім, Жаңаөзен қаласындағы оқыс оқиға туралы білгенде, үлкендердің тәлім-тәрбиесі кемшін түскен жоқ па деген ой мазалайды. Қайдан білейін, қазіргі қоғамда үлкендердің айтқанынан гөрі ақшалы топтардың әмірі басым болып кетуі де мүмкін ғой. Жаңаөзен қаласындағы оқиғаға себепші болған ағайынның арасында мүмкін қалталы топтардың ықпалында кеткен жастардың өз еріктеріне ырық бере алмағаны әсер еткен шығар.
Тегінде, қазақ халқы Тәуелсіздікті ұдайы мұрат еткен. Сол жолда қасық қанын қиып отырған. Демек, қазақ халқы үшін Тәуелсіздіктен қымбат нәрсе болмауы тиіс. Ал Жаңаөзен қаласындағы бауырлардың дәл осы сәттегі әрекеті көңілге қонбайды. Мүмкін, мұның артында қазақ халқының, қазақ елінің тәуелсіздігін тәрк еткісі келген топтардың ықпалы болуы әбден мүмкін. Бірақ, біздің ынтымағы жарасқан халқымыз мұндай өрескел әрекетті ешқашан қолдамайды. Бұл – біздің тәуелсіздігімізге төнген қатер. Елдікті, қазақ халқының әлемдік саясаттағы беделін ойлайтын біздің буын дәл бұлайша қимыл жасамауы қажет еді. Ағайын арасында болатын кикілжіңге түсіністікпен қарайтын жұрт мұндай мәселеге барынша байыпты көзқараспен қарап, ең оңтайлы шешімін күтуі қажет еді. Амал не, мұнайлы түбектегі бауырлардың бұл ісі бәрімізді қынжылтты.
Қалай айтқанда да, ел Тәуелсіздігінің 20 жылдық мерейтойы сәтінде Маңғыстау өңіріндегі келеңсіз жәйт бабалар аңсаған тәуелсіздік арманын іске асырып жүрген бүгінгі ұрпақтың сағын сындыра алмайды. Ең бастысы, елдің бірлігіне сына қаққысы келген әлдекімдердің арандатуына ұрынып қалмайық, ағайын.
Бимырза АМАНГЕЛДІҰЛЫ.
Атырау облысы.