Дәл ел Тәуелсіздігінің 20 жылдық мерейтойы өтіп жатқан тарихи сәтте мұндай сұмдық оқиға болады деп кім ойлаған? Жаңаөзендегі жағдайды теледидардан көріп, жағамды ұстадым. Бұзақылардың істеп жүргендері мүлдем дұрыс емес. Бейқам жатқан елдің шырқын бұзып, дүрліктіріп жіберді. Қашанда халықтың тыныштығын, береке-бірлігін тілеп отыратын біз сияқты аға ұрпақ өкілдері мұндайға жол берген ағайындарға өкпеліміз.
Меніңше, бұл мұнайшылардың өз тарапынан жасаған әрекеті емес, сырттан ықпал етіп отырған арандатушы күштердің жымысқы саясаты деп білемін. Өйткені, біздің еліміз осы жиырма жылда өсіп, өркендеп, басқа мемлекеттер қызыға да қызғана қарайтындай қарыштап дамып кетті. Ел ішіндегі айрандай ұйыған татулық пен тұрақтылықтың нәтижесінде Қазақ елі өзінің ішкі-сыртқы саясатын сауатты жүргізіп, барлық жағынан алдыңғы қатарға шықты. Міне, осы жетістігімізді көре алмайтындар, іштарлық етуші жат пиғылды күштер Жаңаөзендегі оқиғаға тікелей әсер етіп, бұзақылардың қолымен от көсегісі келді. Бірақ біз бұған алданып, арандап қалмауымыз керек. Елдегі тентектерді тезге салып, тиісті жазасын беруге тиіспіз. Ал арам ойларын жүзеге асырмақ болған сыртқы күштерге мемлекет тарапынан мықты тосқауыл қойылса, жақсы болар еді. Мұндай қиын-қыстау шақта өз ішімізде алауыздық танытпай, алыпқашпа сөзге еріп дүрлікпей, бір шаңырақтың астына топтасып, Қазақстанды арандатушы топтардан арашалап қалуға тырысайық.
Шығыс Қазақстан облысындағы ардагерлер және ақсақалдар кеңесінің мүшелері маңғыстаулық мұнайшыларды осындай сын сәтте сабырлылық сақтап, тәуелсіздіктің тәтті жемісін тата беруге шақырады. Ел тыныштығын ойлап, болашақта Қазақстанның қарыштап алға баса беруіне үлес қосайық, ағайындар. Мен өзім 40 жыл бойы Өскемен қорғасын-мырыш комбинатында қарапайым металлург болып еңбек еттім. Қажырлы еңбегім лайықты бағаланып «Еңбек Даңқы» орденінің толық иегері атандым. Бұл «Еңбек Ері» деген атаққа пара-пар. Демек, ел игілігі үшін адал еңбек еткенге не жетсін!
Қайырбек АЙЖІГІТОВ, ардагер металлург, «Еңбек Даңқы» орденінің толық иегері.
ӨСКЕМЕН.