Мен Ұлы Отан соғысына қатысып, от пен оқтың ортасында талай рет өлім ауызынан аман қалған адаммын. Жиырма жылдай облыстың ардагерлер кеңесін басқардым. Жасым сексеннің сеңгіріне келсе де жұмыстан қол үзбедім. Соңғы бір-екі жылда ауыр сырқат тап болды. Мойындадым, бір аяқты кесуге тура келді. Бәрі сәтті болды. Қатарға қосылып келемін. Шіркін-ай, осындай сәттерде солар үшін ештеңені аямаған кейбір жас ұрпақтарымыздың қылықтары қынжылтады. Бүкіл әлем алдында ұят болатындай жағдайға тап болдық. Халқымыз ата-баба арманы тәуелсіздікке қол жеткізіп шат-шадыман өмір сүріп жатқанда мұндай келеңсіздікке, бұзақылыққа бару барып тұрған ақымақтық. Ақылсыздық. Кейбір жастардың сана-сезімінің таяздығы. Сондықтан ондайлар тиісті жазасын алуы керек. Өркен жайып өсіп, қарышты қарқынмен дамыған елімізді көре алмайтындардың бар екенін бәріміз де білуіміз керек. Қара ниетті адамдардың алдап-арбауына түспеуді ойлау қажет. Бұл ретте Елбасының бейбіт халықтың қауіпсіздігін сақтау үшін Жаңаөзен аумағында төтенше жағдай жариялауы өте дұрыс болды. Бұл әрі тыныштықты сақтауға, әрі бұзақылықтарды іздеп-тауып, тиісті жазаға тартуға мүмкіндік беретін шара. Алдағы уақытта да қарапайым халық зардап шекпеуі үшін баршамыз да қырағы болайық.
Т.ИГІЛІКОВ, Ұлы Отан соғысының ардагері.
ЖАҢАӨЗЕН.