Жылқы малын халқымыз ежелден мінсең – көлік, жесең – ас, ішсең сусын деп қатты бағалаған. Өкінішке қарай, кешегі кеңес заманында алып империяның Хрущев сынды әпербақан басшысы сол қасиетті жылқы малына қырғидай тиген. Абырой болғанда еліміз егемендікке қол жеткізгеннен бергі жерде аузымыз аққа жари бастады. Соның бір айғағындай, бүгінде кешегі Семей атом полигонының нақ іргесіндегі Саржал, Қайнар ауылының даңқы енді бал татыған сары қымызымен бүкіл ел көлемінде танылып қалды. Саржалда қымыз цехы жұмыс істеп тұр. Соның нәтижесінде құтыға құйылған қымыз алыс-жақын жерлерге толассыз жөнелтілуде.
Енді, міне, биылғы жылдың наурыз айынан бері қымыз ұнтағын дайындап, оны тіпті шетелдерге жөнелтумен айналысатын «Игеру» атты кәсіпорын іске кірісіп кетті. Елбасымыздың Қазақстан халқына арнаған биылғы Жолдауына орай инновациялық үрдісті игеру мақсатымен ашылған бұл кәсіпорын қаладан Абай еліне шығаберісте орналасқан. Мұндағы құрғақ қымыз өндірісі неміс технологиясымен әзірленеді. Қазірде жүз литр саумалдан үш кило құрғақ ұнтақ алынуда. Еуропа елдерінде оның бір килосының бағасы 20-25 еуро тұратын көрінеді. Ал кәрі құрлық тұрғындары оған неге құмартып отыр дегенге келетін болсақ, биенің жаңа сауылған сүті ана сүтінің құрамына 90 пайыз жақындайды екен. Сол себептен де Еуропаңызда әлгі қымыз ұнтағы негізінен косметология, фармацевтика саласында, балалардың диеталы тағамдарына қолданылуда. Сондай-ақ, бұл өнімге ғарышкерлер, альпинистер мен шахтерлардың да сұранысы артып отырған көрінеді.
Осындай игілікті шаруамен айналысатын «Игеру» кәсіпорны Семейдегі «Ибраев-К» өндірістік кооперативінің құрамында жұмыс жасап жатыр. Аталған кооперативтің бас директоры Ғаббас Ибраев бұрын темір жол саласындағы ерен еңбегімен көзге түссе, енді тың бастаманы қолға алып отыр. Оның сан-салалы еңбегі ескерусіз қалып отырған жоқ. Соның айғағындай, ол бүгінде облыстың құрметті азаматы, облыстық мәслихаттың депутаты. «Игерудің» игілігін ел көріп жатса, мақсатымыздың орындалғаны дейді ол.
Дәулет СЕЙСЕНҰЛЫ.
СЕМЕЙ.