Жетісулық жас оқырмандар ақын Тыныштықбек Әбдікәкімұлының «Алқоңыр дүние» атты кітабы туралы пікір алмасты. Басқосу көрнекті ақынның өлеңдерін оқумен басталып, Мемлекеттік сыйлыққа ұсынылып отырған кітап жайында еркін талқылауға ұласты.
– Бүгінгі басқосуда Тыныштықбек Әбдікәкімұлының шығармашылығын талқыладық. Тыныштықбек ақын қазіргі қазақ поэзиясындағы құбылыс қой. Өлеңдері өте ойлы, терең. Өкініштісі, ақынның атын естігенімен, шығармашылығынан хабары аз жастар да бар екен. Бүгінгі кездесуде олар өздеріне бір сырлы әлемнің қақпасын ашқандай болып отырды. Сондықтан осындай рухани басқосудың жиі өтуін қалаймыз, – деп өз ойын білдірді жас ақын, Жазушылар одағының мүшесі Жангелді Немеребай.
Қазақстан Жазушылар одағы Алматы облыстық филиалының басшысы, ақын Ерлан Жүністің ұйымдастыруымен өткен шығармашылық басқосу енді тұрақты жалғаспақ.
– Алғашқы пікірталасқа Тыныштықбек Әбдікәкімұлының «Алқоңыр дүние» кітабы негіз болды. Алдағы күндері Ақұштап Бақтыгереева, Мархабат Байғұт, Өтеген Оралбаев, Ғалым Жайлыбай секілді қаламгерлердің шығармашылығына қатысты талқылаулар өткізуді де жоспарлап отырмыз, – дейді Қазақстан Жазушылар одағы Алматы облыстық филиалының басшысы.
Қалмаханбет МҰҚАМЕТҚАЛИ, «Егемен Қазақстан»
Алматы облысы