Сыртқы істер министрі Қайрат Әбдірахманов пен шетелдік дипломатиялық миссиялар басшылары Азиядағы өзара іс-қимыл және сенім шаралары жөніндегі кеңесі (АӨСШК) Хатшылығына барып, арнайы жасақталған конференц-залдың ашылу рәсіміне қатысты.
Азиядағы өзара іс-қимыл және сенім шаралары жөніндегі кеңесін (АӨСШК) құру идеясын Қазақстан Президенті Нұрсұлтан Назарбаев тұңғыш рет 1992 жылы 5 қазанда БҰҰ Бас Ассамблеясының 47-сессиясында ұсынған болатын.
Ұйым алғашқы кезеңде 16 мемлекеттің басын қосты. Қазіргі уақытта аталған ұйым 27 мемлекетті біріктіріп отыр. Сондай-ақ тағы жеті мемлекет пен төрт халықаралық ұйым, оның ішінде БҰҰ Азиядағы өзара іс-қимыл және сенім шаралары жөніндегі кеңесіне бақылаушы ретінде қатысады.
Аталған ұйымға біздің еліміз 2002-2010 жылдар аралығында төрағалық етті. Қазір ұйым тізгіні Қытай Халық Республикасының қолында.
Ұйымның хатшылығы 2006 жылы құрылып, Астанада қоныс тепті. Енді міне, Сыртқы істер министрі Қайрат Әбдірахманов бастаған делегация хатшылықтың заманауи мәжіліс залын ресми түрде ашты.
Конференц-зал соңғы үлгідегі байланыс және бейне, дыбыс зорайтқыш, мультимедиялық құрылғылармен жабдықталған. Әлемдегі озық технологиялар қолданылып, осында өтетін кездесу-жиындарды таспаға басу барынша жеңілдетілген.
Сыртқы істер министрі цифрландыру мен автоматтандырудың озық үлгілерін көріп, мұндай жабдықтардың Астанадағы кеңселерде кездесе бермейтіндігін атап өтті. Құрал-жабдықтар ұйымның қазіргі төрағасы – Қытай Халық Республикасы тарапынан қаржыландырылған.
Делегация құрамындағы елшіліктердің өкілдері де Азиядағы өзара іс-қимыл және сенім шаралары жөніндегі кеңесінің мәжіліс залының ашылуымен құттықтап, жаңа технологиялардың жұмыс сапасын жетілдіре түсуге септігін тигізеріне сенім білдірді.
Серік ӘБДІБЕК,
«Егемен Қазақстан»