«Қазақстанда ұшақ билетінің құны қымбат. Туризмнің дамуына кедергі келтіріп тұрған себептің бірі – осы». Атыраулық кәсіпкерлермен кездескен Шотландияның Абердин қаласы әкімшілігінің кеңесшісі Джон Рейнольдс осындай пікір айтты.
Атырау мен Абердин арасындағы байланысты нығайту мақсатында арнайы келген делегация бірқатар келіссөздер жүргізді.
– Тек өзіңе ғана жұмыс істесең, көкжиегің кеңімейді. Әлемдік нарыққа шығудың жолдарын қарастыру керек, – дейді Джон Рейнольдс.
– Біз IT, ауыл шаруашылығы, өнеркәсіп салаларында технологияларымызды ұсына аламыз. Мен Қазақстанда соңғы рет 2004 жылы болғанмын, одан бері көп нәрсе өзгеріпті. Компанияларыңыз бізге жақсы қызметтер мен тауарлар ұсына алатынын көрдім. Атырауда туризмді дамыту әлеуеті жоғары, бірақ әуе билеттерінің бағасы тым қымбат. Лондоннан осы жерге келгенше жаратқан қаржыма мен Еуропаны түгел аралап шығуыма болар еді. Бюджеттік әуе жолын тарту арқылы бұл мәселені шешудің жолы бар деп есептеймін.
Шотландық компаниялар негізінен мұнай саласына шоғырланған. «Феникс ИСА» ЖШС бас директоры Дүйсенбек Смағұлов қонақүй бизнесі, құрылыс материалдарын өңдеу бойынша да шетелдік кәсіпкерлермен бірлесе жұмыс істеуге ниетті екендерін айтады.
Қазір аймақта британдық капиталдың қатысуымен 88 компания жұмыс істеп жатыр. Биылғы бірінші тоқсанда Атырау облысы мен Ұлыбритания арасындағы сыртқы сауда айналымы 46 млрд доллардан асты. Өткен жылмен салыстырғанда 67%-ке төмендеген. Дөңгелек үстел басына жиналған екі ел кәсіпкерлері осы көрсеткішті көбейтуге уағдаласты.
Бақытгүл БАБАШ,
«Егемен Қазақстан»
АТЫРАУ