Қаңтардың соңғы күндеріндегі жаңбыр мен қардың мол түсуі өңірде ылғалдың шамадан тыс жиналуына әкелді. Оған ақпандағы ауа райының күрт жылынуы мен жылы жаңбырдың әсері қосылып, көптеген аймақтарда сел қаупін туғызып, әбігерге салды.Қазіргі кезде Панфилов ауданындағы Қырыққұдық, Іле ауданындағы Ақши, Ұйғыр ауданындағы Шонжы, Жамбыл ауданындағы Ұзынағаш, Тарғап, Ескелді ауданы және Қапшағай қалаларындағы ойпаң жерге орналасқан тұрғын үйлерді, көшені су басып, жедел көмек қажеттігін көрсетті. Осыған орай облыс әкімдігі мен төтенше жағдайлар жөніндегі департамент қызметкерлері, әскерилер тұрғындардың қыстың көзі қырауда жапа шекпеу шараларын қарастырып, қажетті техника түрлерін жұмылдыруда. Сондай-ақ, халықты қауіпсіз жерге көшіру, орналастыру жұмыстары да ұйымдастырылған.
Панфилов ауданындағы Қырыққұдық ауылындағы отбасылары уақытша қонақүйлерге орналастырылса, Ұйғыр ауданындағы Қалғантам және Ұзынтаң елді мекендеріндегі көпірлерді қалпына келтіру жұмыстары қолға алынып, адам күші, техника жұмыс істеуде. Тарғап ауылындағы 40-тан астам отбасы қауіпсіз жерге көшірілсе, темір жол бекеттерінің бойындағы халықтың да қауіпсіздігін қамтамасыз ету мақсатындағы жұмыс жалғасуда.
Жағдай Күрті су қоймасының төменгі сағасына орналасқан Ақши ауылында күрделі. Мұндағы 6 000 адам қауіпсіз аймақтарға көшірілген. Облыс әкімінің орынбасары Болат Тәкенов пен Іле ауданының әкімі Николай Логутов басқарған комиссия мүшелері тұрғындардың отбасылары мен мал-мүлкін селдің шайып кетпеуі үшін платинадағы суды бірнеше компрессорлар арқылы арнасына жеткізбей ағызуды жалғастыруда. Селдің алдын алу шараларына 20 техника, жүзден астам адам күші жұмылдырылып, төтенше жағдай жарияланған.
Жағдай әлі де қауіпті қалпында қалып отыр. Бұған ауа райының күрт жылынып, жаңбырдың жиілеуі қосылса, қауіпті сейілтпейтіні айтпаса да түсінікті. Демек, тұрғындардың үйлеріне оралуына әлі ерте. Ал, комиссия мүшелері түнгі, күндізгі кезекшілікті ұйымдастырып, қауіпсіздік шараларының алдын алып, бар мүмкіндікті жұмылдыруда.
Күмісжан БАЙЖАН, Алматы облысы.