Қарағанды облысының Абай қаласында 12 адам дөнерден уланып қалды, деп хабарлайды ҚазАқпарат.
2018 жылы қазанның 22-нен 24-не дейінгі аралықта Абай қаласында 12 адам медициналық көмекке жүгінді, оның ішінде 8-і ауруханаға жатқызылған, зардап шеккендер қатарында бір бала бар.
Қарағанды облысы Қоғамдық денсаулық сақтау департаментінің ақпаратынша, зардап шеккендерге «Өткір ішек-құрылысы инфекциясы» диагнозы қойылды. Медициналық көмекке жүгінген қала тұрғындарының барлығы ауырар алдында жергілікті дөнерханада тамақтанған.
Ішек-құрылысы инфекциясының әрі қарай таралып кетпеуі мақсатында және жағдайды тұрақтандыру үшін дөнерханада жоспардан тыс тексеріс жүргізіліп, азық-түлік өнімдерінен, қоршаған ортадан және судан сынамалар алынып, зертханаға жіберілді. Сонымен қатар дәмхананың қызметкері де патогенді микроорта тасымалдаушысы болуы мүмкіндігі тексерілді. Нәтижесінде санитарлық-эпидемияға қарсы шаралар өткізу және дөнерхана қызметкерін уақытша жұмысынан алшақтату туралы қаулы шығарылды. Сондай-ақ, қарым-қатынаста болған тұлғалар анықталды. Қазіргі таңда оларды жергілікті емханалардағы учаскелік дәрігерлер бақылауда.
Санитарлық қызмет мамандары Абай ауданының әкімдігіне, Прокуратураға, ТЖ басқармасына, ІІБ-ге тұрғындар арасында жаппай дертке шалдығу дерегін тіркеу жөнінде ақпараттық хаттар жолдады. Эпидемияға қарсы шаралар жалғасуда. Аталмыш мәселе Қарағанды облысының Қоғамдық денсаулық сақтау департаментінің бақылауында.