Л.Н.Гумилев атындағы Еуразия ұлттық университетінде «Еуразия халықтарының тарихи-мәдени мұраларын зерттеудің өзекті мәселелері» атты XV Еуразиялық ғылыми форум өтті.
Форумның мақсаты – Елбасы ұсынған рухани жаңғыру контексінде Еуразия халықтарының тарихы, мәдени дәстүрлері мен рухани мұралары мәселелерін зерттеу және өзектендіру. Жиынға отандық және шетелдік ғалымдар мен Ресей, Болгария, Өзбекстаннан келген сарапшылар қатысып, орамды ойлары мен пайымды пікірлерін ортаға салды.
«Бұл форум дәстүрлі түрде өткізілуімен және ғылым саласында елеулі еңбек етіп жүрген ғалымдардың басын қосуымен ерекшеленеді. Дәстүрлі деп атауымның да сыры бар, себебі биыл ХV мәрте ұйымдастырылып отыр. Отандық және шетелдік ғалымдар жиылған бүгінгі басқосудың маңызы зор. Сонымен қатар шара аясында «Гумилев оқулары» да ұйымдастырылады.
Еуразиялық ғылыми форум оқу-әдістемелік емес, сонымен қатар ғылыми-тәжірибелік бағытты да ұстанады. Сондықтан да осы күндері Қазақстан тарихшыларының VІ конгресі өтіп, соның аясында, Елбасының «Болашаққа бағдар: рухани жаңғыру» атты бағдарламалық мақаласының негізінде жарық көрген бірнеше кітаптың тұсаукесері өткізілетінін айта кеткен абзал. Осы іспетті маңызды мәслихаттар Еуразия халықтарының тарихы мен тамырын танып-білуге, халықтар достығын нығайта түсуге серпін берері сөзсіз», деді Л.Н.Гумилев атындағы ЕҰУ ректоры, ҰҒА академигі Ерлан Сыдықов.
Ерлан Бәттәшұлы тізгінін ұстаған жиында тарих ғылымдарының докторы, профессор, Ә.Марғұлан атындағы Археология институтының Астана қаласы филиалының бас ғылыми қызметкері, Герман археология институының корреспондент-мүшесі Зейнолла Самашев «Ерте сақ мәдени кешенінің қалыптасуы», Мемлекет тарихы институтының директоры, тарих ғылымдарының докторы, профессор Бүркітбай Аяған «Қазақ мемлекеттілігінің тарихы туралы жаңа деректер: Әбілхайыр Шайбани қозғалысының бағыты» тақырыбында баяндама жасады. Л.Н.Гумилев атындағы ЕҰУ Қазақстан халқы Ассамблеясы кафедрасының меңгерушісі, экономика ғылымдарының докторы, профессор Анатолий Башмаков «Қазақстанның өзіндік әлеуеті және қоғамдық сананы жаңғырту: синергияның әсері» жөнінде әңгіме өрбітсе, Ш.Уәлиханов атындағы Тарих және археология институтының директоры, тарих ғылымдарының докторы, профессор Зиябек Қабылдинов «ХVIII- ХХ ғғ. Отан тарихының өзекті мәселелері» тақырыбында сөз сөйледі.
Сондай-ақ Болгариядан келген профессор Камен Величков «Жан-жақтылықтың бірлік принципі: еуропалық үлгі» тақырыбы төңірегінде баяндаса, Ресейден келген тарих ғылымдарының кандидаты, Новосібір мемлекеттік университетінің доценті Олег Митько «Біздің дәуіріміздегі бірінші мыңжылдықтың бірінші жартысының соңындағы алтайлық тайпалардың Шығыс Еуропа даласына қоныс аударуының археологиялық дәлелдері» тақырыбында тартымды әңгімеледі.
Форум аясында жеке бағдарлама бойынша өзге де шаралар өтіп, ғалымдар секция мәжілістерінде баяндамалар жасады.
Ұларбек НҰРҒАЛЫМҰЛЫ,
«Егемен Қазақстан»