Бразилияның Сыртқы істер министрі Қазақстанға ресми сапармен келді

Сапар аясында Қазақстанның Сыртқы істер министрі Қайрат Әб­дірахманов Оңтүстік Америка құр­лығынан келген әріптесі Алоизио Нунес Феррейрамен ресми кездесу өткізді. 

Кездесу барысында Қ.Әбді­рах­манов А.Феррейраны өткен жек­сенбі күні Бразилиядағы пре­зи­дент сайлауының өтуімен құт­тықтады. 

– Бразилия біздің Оң­түс­тік Америка мен Латын Аме­ри­ка­сын­дағы және халықаралық аре­на­дағы басты серіктесіміз. Екі ел географиялық тұрғыда ал­шақ жатқанымен, бізді достық пен ын­тымақтастық, өзара сый­ластық, әрі қарайғы тиімді қарым-қатынастарға мүдделілік байланыстырады, – деді Қ.Әбдірахманов. 

Министрлер екі мемлекеттің сауда-экономикалық, инвес­ти­ция­лық бағыттарда өзара байланысын нығайта түсу қажет деген тоқтамға келді. Өткен жылы мемлекеттер арасындағы сауда айналымы 135 млн АҚШ долларына жеткен. 

Ал Бразилияның ауыл шаруа­шылығы саласында әлемдегі көшбасшылардың бірі болуы да ынтымақтастықтың жаңа қыр­ларын ашуға септігін тигізбек. 

Оған қоса, 2016 жылдан бастап Қазақстан мен Бразилия арасында визасыз режім енгізілген. 

Ал биыл еліміз алғаш рет Бра­зи­лияға уран тасымалдай бастады. Атап айтқанда, «Қазатомпром» ҰАК» АҚ  Бразилияның «INB» кәсіпорнының халықаралық тен­дерін жеңіп алған болатын. 

– Қазақстан өз тарапынан Бразилиямен жасыл технологиялар, энергетика, әскери-техникалық, ғарыш және туризм саласында бай­ланыстарды жандандыруға мүд­делі, – деді Қ.Әбдірахманов.

Ал көпжақты қарым-қатынас­тарға келер болсақ, Қазақстан мен Бразилияның халықаралық бейбіт­шілік және қауіпсіздік мәселелеріне байланысты көзқарастары ұқсас. 

Сонымен қатар Мемлекет басшысы Нұрсұлтан Назарбаевтың «Тәуелсіздік дәуірі» атты кітабы алдағы жылы Бразилияда португал тілінде жарыққа шығатындығы айтылды. Осы арқылы Қазақстан Президенті бастамашылық еткен «Рухани жаңғыру» бағдарламасы оңтүстікамерикалық құрлықта да тәжірибе жүзінде іске асырылмақ. 

Кездесу барысында өзара қарым-қатынастардың басым бағыттары белгіленді.

Серік ӘБДІБЕК,

«Егемен Қазақстан»