Дүйсенбі күні Астананың «Барысы» бір команданың төрт жеңісіне дейін созылатын Құрлықтық хоккей лигасының плей-офф бәсекесіндегі төртінші ойынында Магнитогордың «Металлургін» тағы да 4:1 есебімен жеңіп, ширек финалға шығуға бір табан жақындай түсті. «Металлург» сияқты лиганың азулы командасымен болған төрт ойында үш рет жеңіске жетіп, бір рет қана жеңілу – өте жақсы нәтиже.
Дүйсенбі күні Астананың «Барысы» бір команданың төрт жеңісіне дейін созылатын Құрлықтық хоккей лигасының плей-офф бәсекесіндегі төртінші ойынында Магнитогордың «Металлургін» тағы да 4:1 есебімен жеңіп, ширек финалға шығуға бір табан жақындай түсті. «Металлург» сияқты лиганың азулы командасымен болған төрт ойында үш рет жеңіске жетіп, бір рет қана жеңілу – өте жақсы нәтиже.
Кездесуде салған беттен қонақтар тек жеңіс үшін ғана айдынға шыққандарын сездіре бастады. Бұл жеңіс оларға аса қажет еді. Алғашқы шайбаны соққандар да солар болды. Ойынның 11-минөтінде Якубовтан пас алған Марков Виталий Еремеевтің қақпасынан саңлау таба білді. Содан кейін «Барыс» арада азғантай уақыт салып, қарсыластар қақпасына лап қойды. Сөйтіп, манадан бері тасқамал болып тұрған фин қақпашысы Ари Ахоненмен бетпе-бет келген Бойд есепті теңестірді. Одан кейін «Барыстың» шабуылы арта түсті. Матчтың 29 минөтінде Пушкарев магниткалықтарға тағы бір шайбаны тоғытты.
Ал ойынның үшінші кезеңінде Юнланд пен Даллмэн бір-бір шайбаның авторы атанды. Өзінің осы голынан кейін Даллмэн қолындағы таяғын тастап, командаластарының құшағына кіріп кетті. Бұл «Барыстың» жеңіске жеткенінің белгісі еді. Себебі, ойын аяқталуға аз-ақ уақыт қалған-тын.
Бүгін астаналық клуб сырт алаңда «Металлургпен» бесінші ойынын өткізеді. Андрей Шаяновтың шәкірттеріне плей-оффтың келесі кезеңіне өту үшін бір жеңіс керек. Қарсыластарымыз үшін – үш жеңіс. «Металлургтің» шебер команда екенін ескерсек, алдан бәрін де күтуге болады. Сондықтан бәсеке тағдыры шешіліп қойды деуге әлі ерте.
Дастан КЕНЖАЛИН.