ӨНЕГЕЛІ ІС ӨРІСІН КЕҢЕЙТЕЙІК
Кеше Астанада қазақ күресінен Елбасы – Ұлт көшбасшысы Нұрсұлтан Назарбаевтың жүлдесі үшін «Қазақстан Барысы» республикалық турнирін ұйымдастырушылар биылғы өтетін жарыс туралы мәлімет берді.
Бұл турнир былтыр «КТК» телеарнасының бас директоры Арман Шораевтың бастамасымен елімізде тұңғыш рет өткен болатын. Сол кезде ол халық арасында үлкен қолдауға ие болып, оған мыңдаған балуан қатысса, соның ішінен іріктелген ең таңдаулы 64 балуанның финалдық сайыста «Қазақстан Барысы» деген мәртебелі атақ үшін белдескені белгілі. Осы жарыста Алматы облысының тумасы болса да Қызылорда облысының атынан сынға түскен Ұлан Рысқұл жеңімпаз атанып, бас жүлдеге ие болды. Содан бері осы турнирге қызығушылық артып, қазір оны жоғары деңгейде өткізу үшін жұмыстар жүргізілуде.
ӨНЕГЕЛІ ІС ӨРІСІН КЕҢЕЙТЕЙІК
Кеше Астанада қазақ күресінен Елбасы – Ұлт көшбасшысы Нұрсұлтан Назарбаевтың жүлдесі үшін «Қазақстан Барысы» республикалық турнирін ұйымдастырушылар биылғы өтетін жарыс туралы мәлімет берді.
Бұл турнир былтыр «КТК» телеарнасының бас директоры Арман Шораевтың бастамасымен елімізде тұңғыш рет өткен болатын. Сол кезде ол халық арасында үлкен қолдауға ие болып, оған мыңдаған балуан қатысса, соның ішінен іріктелген ең таңдаулы 64 балуанның финалдық сайыста «Қазақстан Барысы» деген мәртебелі атақ үшін белдескені белгілі. Осы жарыста Алматы облысының тумасы болса да Қызылорда облысының атынан сынға түскен Ұлан Рысқұл жеңімпаз атанып, бас жүлдеге ие болды. Содан бері осы турнирге қызығушылық артып, қазір оны жоғары деңгейде өткізу үшін жұмыстар жүргізілуде.
Бұл туралы кешегі кездесуде «Қазақстан Барысы» турнирін ұйымдастыру комитетінің мүшелері жан-жақты айтып берді. Ал бұл комитеттің құрамына Спорт және дене шынықтыру істері агенттігі төрағасының орынбасары Елсияр Қанағатов, «КТК» телеарнасының бас директоры, «Қазақстан Барысы» қазақ күресін дамыту қоғамдық қоры қамқоршылар кеңесінің төрағасы Арман Шораев, Дүниежүзілік қазақ күресі федерациясының президенті Серік Төкеев, Мәдениет және ақпарат министрлігі Ақпарат және мұрағат комитетінің төрағасы Болат Қалиянбеков, «Самұрық-Қазына-Астана» корпоративтік қорының атқарушы директоры Серік Жұмағалиев кіріп отыр.
Кездесуде олар «Қазақстан Барысы» сияқты қазақ күресін дамытуға арналған ғаламат турнирдің мақсаты мен маңызы туралы айта келіп, осы жарысты өткізуге байланысты өз салалары бойынша істеліп жатқан жұмыстарымен бөлісті. Мәселен, А.Шораевтың айтуынша, жобаның басты мақсаты – балуандардың әлеуметтік жағдайын жақсарту, төл күресіміздің өрісін кеңейту, ұлттық дәстүрді жаңғырту арқылы өскелең ұрпақтың бойында отансүйгіштік қасиеттер қалыптастыру, қазақ күресінің Азия, Олимпия ойындарының бағдарламасына енуіне ықпал ету. Сонымен бірге, ол осы жарыс арқылы қазақ күресін еліміздегі №1 спорт түріне айналдыру мақсаты қойылып отырғанын айтты.
Кездесуде Е.Қанағатов турнирге мемлекет тарапынан үлкен қолдау көрсетілетінін, қазақ күресі сияқты ұлттық спорт түрлеріне қазіргі кезде барлық жағдай жасалып жатқанын жеткізсе, С.Төкеев биылғы өтетін жарыстың ережесі мен ерекшеліктері туралы айтып берді. Оның айтуынша, биылғы жарыс төрт кезең бойынша наурыз бен қыркүйек айлары аралығында өткізіледі. Мысалы, бірінші кезең наурыз бен сәуір аралығында ауылдық елді мекендерде өтсе, екінші кезеңдегі жарыстар мамыр мен маусым айлары аралығында өтіп, аудандық, қалалық жерлерді қамтиды. Осы жарыстарда жеңімпаз атанғандар үшінші кезеңде, яғни облыстық іріктеу жарыстарына қатысып, одан әрі төртінші кезеңде, 16-18 шілде аралығында өтетін сайыста күш сынасады. Бұл жарыс Алматы қаласында үш күндік оқу-жаттығу кезінде өткізіледі. Ал «Қазақстан Барысы» турнирінің финалдық сайысы 15-16 қыркүйек күндері Астанада өтеді. Оған тек түйе балуандар ғана қатысады. Бас жүлде – Тайтұяқ пен Алтын белбеу болады. Жеңімпаз, сондай-ақ 150 мың АҚШ долларын иеленеді. Екінші, үшінші орын алғандарға күміс және қола белбеу тағылады. Олар ақшалай сыйлыққа да ие болады.
Биылғы турнирдің тағы бір ерекшелігі – финалға 64 емес, 32 балуан ғана қатыса алады. Оған әр облыстан 2 балуанның ғана қатысуға мүмкіндігі бар және балуандардың өзі сол облыстың тумасы болуы керек. Сонымен бірге, турнирдің жүлде қоры 50 миллион теңгені құрайтын болады. Бұл сома өткен жылғы жүлде қорынан 10 миллион теңгеге артық. Қомақты ақша 1-8 орын алған балуандарға және олардың бапкерлеріне беріледі.
Биыл «Қазақстан Барысы» турнирін «Сарыарқа» велотрек кешенінде өткізу жоспарлануда екен. Турнир туралы толығырақ мәліметті www.kazakhstanbarysy.kz сайтынан алуға болады.
Дастан КЕНЖАЛИН.