Алмабақтағы арулар

Нағыз көркем туынды уақыт өлшеміне бағынбайды. Осыдан жарты ғасыр бұрын Айша Ға­лым­­баеваның қаламынан тамған «Қазақстан әндері» атты осы бір­­ отты картина өз кезінде қа­лай­ жоғары бағаланса, қазір де му­зей қабырғаларындағы жаны­мыз­ға жылы ұшырайтын бірегей туын­дылардың көш басында тұр. Қолтаңбадан суретші ұлттық көркемдік мәнерді ал­ғаш­қы орын­ға қойғанын анық аңғарамыз. 

Алыстан болымсыздау ғана көрінген ақар-шақар шыңдар да­ланың кеңдігін әйгілесе, айналаны көмкерген жасыл бар­қыт белдер­ табиғат ананың көр­песіндей көр­кем көрініс береді. Зау биікке мо­йын созған балапан шыршалар қыз­ғалдақ қыздардың қырмызы үні­не тамсана құлақ түргендей. Ару­ларға сая болған алып алма ағашынан төгілген ақ ұлпа гүлдер әнмен бірге арман қанатына ілесіп алысқа ұшады. Қыздардың үс­тіндегі аппақ бүрмелі көйлек ақ айдын секілденіп, арулар сол айдында ақ қанатын керген аққу құсқа ұқсайды. Айдында қалықтаған аққу ән ақ сәулеге ұласып, домбыра шанағынан төгілген салқар сезім сайын даланы салқын лебімен аялайды. Бойжеткендердің білектей бұ­рымы еркіндікті, кеңдікті елес­тетеді.

«Айша апамыздың ең бір іргелі шығармасына бала­натын бұл туын­ды әртүрлі түс­терге бай. Шығар­ма­ның ком­по­зициялық шешімі аспаннан нұр боп құйылып түсіп жат­қандай көрінеді. Жайбарақат, жаймашуақ көңіл күй ырғағы қа­зақ қыздарының өнерге бай екенін, көңілі кең екенін барынша ашып көрсеткен. Әдетте ақ түспен жұмыс істеудің қан­шалықты қиын екенін кез кел­ген суретші бі­лу­ге тиіс. Айша Ға­лымбаева ақ түс­ті сәтті пайдалану арқылы кар­тинаның ажарын ашқаны нағыз шеберге тән қайталанбас қолтаңба деп айта аламыз. Картинаның мән-мазмұны қазақ халқымен бірге жасай бермек», дейді Қазақстан Суретшілер одағының мүшесі Шаттық Батан.

Арман ОКТЯБРЬ,

«Егемен Қазақстан»

АЛМАТЫ