Жастар мәселесінде түйіні шешілуге тиіс дүниелер бар. Оның бір парасын Елбасымыз атап көрсетті. Мысалы, өзім жұмыс істеп келе жатқан салаға қатысты айтар болсам, жас кәсіпкерлердің құқықтық мәртебесінің анықталуы керек деп санаймын.
Қолданыстағы заңнамаларда «жас кәсіпкер», «жастар кәсіпкерлігі» деген ұғым бекітілмегендіктен, мемлекет тарапынан оларды қолдау шаралары да жүйелі жүргізілмейді. Сол себепті «жас кәсіпкер», «жастар кәсіпкерлігі» ұғымын заң жүзінде нақтылап, бекітіп, оларға қатысты мемлекеттік қолдауды заңнамалық тұрғыдан қамтамасыз етуді, сонымен қатар жас кәсіпкерлердің реестрін қалыптастыруды ұсынамын. Осылайша, жастардың жеке іс бастауына, өз бетінше жұмыс істеуіне, табыс табуына жағдай жасап, қоғамға пайдалы азамат болуына жол ашу керек.
Елбасымыз шағын және орта бизнесті дамыту керектігін үнемі айтып келеді. Кешегі салтанатты жиында да Үкіметке «Бизнестің жол картасы-2020» бағдарламасының аясында жас кәсіпкерлер үшін қаржылай грант көлемін екі есеге арттыруды тапсырды, студенттерді де бизнеске баулуды ұсынды. Елімізде шағын және орта бизнесті дамытуға 3 жылдың ішінде 32 млрд теңге бөлу үлкен қолдау екені сөзсіз. Шағын кәсіпкерлікті дамытуда жас кәсіпкерлердің мүмкіндігі мол. Себебі олар өте белсенді, іскер, бизнестің қыр-сыры туралы білімдері кемел. Қоғамның негізгі қозғаушы күшіне айналуға қабілетті. Оларға дер шағында қолдау жасап қолтығынан демесе, аз жылда жас кәсіпкерлердің ісі кең қанат жаятынына сенімім кәміл. Жалпы, биылғы жыл жастар мәселесіне қатысты басқа да маңызды мәселелер мен бастамалардың бастауы болады деп санаймын. Жастар мәселесі әрдайым өзекті болғанымен, бұрын кейбір дүниелер кейінге қалдырылып келгені жасырын емес. Енді бәрі басқаша болуы керек. Әр саладағы мәселелерді түпкілікті шешетін ұзақ мерзімді стратегиялық шешімдер қабылданса, кешенді шаралар атқарылса деп тілеймін және оған үміт артамын.
Жастарға негізгі құндылықтарды анықтап берсек, онда алдағы жылдары соның жемісін көре бастаймыз.
Мақсат ҚОЖАМБЕК,
Қазақстанның жас кәсіпкерлері қауымдастығының төрағасы