Мереке күндері Алматы қаласы мен Алматы облысында зиялы қауыммен, ғалымдармен және инженерлермен кездестім.
Халықтың арасында жүріп, көп нәрсені көкейге түйдім. Сондықтан естігенімді емес, көргенімді, жүрегіме түйгенімді айтқым келеді. Алдымен, біз бүгін шын мәнінде тарихи сәтті бастан кешіріп жатқанымызға назар аударсам деймін. Елбасының тарихи шешімі мен елдің даму жолындағы тың өзгерістер халық тарапынан қызу қолдау табуда. Халық Елбасы Нұрсұлтан Әбішұлының айналдырған 30 жылдың ішінде бүкіл әлем мойындаған, алпауыт елдердің өздері санасатын, экономикасы тұрақты, саяси әлеуеті зор, қуатты мемлекет құрғанын ерекше айтып, өздерінің шексіз ризашылықтарын жеткізуде. Елбасының есімі ел тарихына алтын әріппен жазылатын тұлға болып қалатынын да айтып, өздерінің қолдауларын білдіріп жатыр. Елбасы Қазақстанды саяси тұрақты, бүкіл әлем таныған және құрметтейтін, заманауи, қарқынды дамып келе жатқан озық мемлекетке айналдыра білді. Қазақстан барлық экономикалық көрсеткіштер бойынша Орталық Азияның көшбасшысына айналды. Тұңғыш Президенттің ерен еңбегінің арқасында біз әлемнің бәсекеге қабілетті 50 елінің қатарына қосылдық. Алдымызда дамыған 30 елдің қатарына енуге бағытталған нақты мақсаттар тұр.
XXI ғасырда жаңа Астанамыздың бой көтеруі де Тұңғыш Президентіміздің ең басты ерліктерінің бірі. Бар-жоғы 20 жылда бас қаламыз Тəуелсіз еліміздің шынайы бет-бейнесіне, халқымыздың мақтанышына айналды. Астанамыз, өткеннің құндылықтарын көрсете отырып, күллі əлемге Қазақстанның жаңа бейнесін көрсетті. Елбасының осындай қыруар еңбектерін ел болып бағалап, Парламенттің бірауыздан қабылдаған шешімі негізінде Қазақстан Президенті Қасым-Жомарт Тоқаев Астана қаласын Нұр-Сұлтан деп атау туралы Жарлыққа қол қойды. Өз басым бұл қадамды халықтың Қазақстанның Тұңғыш Президентіне көрсеткен құрметі деп білемін және оны толығымен қолдаймын. Сондай-ақ бұл шешімді уақтылы және орынды қабылданды деп есептеймін. Дәл осындай сөзді елдегі зиялы қауым өкілдері, ғалымдар мен инженерлер де айтуда.
Бақытжан ЖҰМАҒҰЛОВ,
Сенат депутаты