Энергетика министрінің бұйрығымен Серік Жүсіпұлы Сүлейменов Атомдық және энергетикалық қадағалау мен бақылау комитетінің төрағасы қызметіне тағайындалды. Бұл туралы Премьер-Министрдің баспасөз қызметі хабарлады.
С. Сүлейменов 1966 жылы Алматы қаласында дүниеге келген. С. М. Киров атындағы Қазақ мемлекеттік университетін, Әл-Фараби атындағы Қазақ мемлекеттік университетін тәмамдаған.
Еңбек жолын 1990 жылы Алматы қаласында ҚазКСР Ғылым академиясы жанындағы Математика және механика институтының аспиранты ретінде бастаған. Әртүрлі жылдары коммерциялық секторда жұмыс істеген, Президент Әкімшілігінде және Премьер-Министрдің Кеңсесінде жұмыс тәжірибесі бар.
2013–2015 жылдары «Қызылорда электр таратушы желілік компаниясы» АҚ басқарма төрағасы, директорлар кеңесінің төрағасы лауазымдарын атқарған. 2015 жылғы қазаннан бастап қазіргі таңға дейін Қызылорда облысының әкімінің орынбасары қызметін атқарған.