Садық ағамыздың ақындығы да бар. Көп әннің әрін ашатын «тілін» де өзі жақсы тауып, екеуін екпіндетіп қоса туындатып жібереді, ондайда әуен мен сөз әдемі жымдасып, жақсы жарасым тауып шырайланып шыға келеді.
Өткен жылдың аяғында «Өнер» баспасынан Садық Құнанбаевтың «Тұлпарсазда ауылым немесе Садықтың сазды әндері-ай» атты әндер жинағы жарыққа шықты. Мұнда композитордың жүзден аса әні нотасымен берілген. Ең алдында көңіл аударып, көш бастап тұрғаны – «Тәуелсіздік – ұлы күн!», одан кейін «Туған елім – Қазақстан», «Астана – әнім менің», «Айналдым Алматымнан» деп жалғасып кете барады.
Жинақтың бас жағында Садықтың әндеріне кезінде ыстық ықыласын, жылы лебізін білдірген әдебиетіміз бен өнеріміздің Бибігүл Төлегенова, Шерхан Мұртаза, Қадыр Мырзалиев, Нұрғали Нүсіпжанов тәрізді тұғыры биік тұлғаларының сөздері келтіріліпті.
Қалың қазақтың қайран Қадыры «Бұл жігітті мен көп жылдардан бері білемін. Маған келгенде, алдымен өлеңін көрсететін. Ән жазатынын кейін білдім. Алғашқы кітабы − «Менің Мойынқұмым». Сол кітабына кезінде қолтаңба беріп, бір ауыз өлең жазғаным рас – «Құнанбаевтар қатарында тұрғаның –қандай жақсы, бауырым!».
«Садық-ау, тыңдадық қой
әніңді мың, Айтайын өлеңіңнің тәуірлігін. Ауылын Алатауға арқалаған, Бір ұлы сендей болсын Мойынқұмның!
13 тамыз, 2010 жыл, Алматы қ.» деп жазыпты өзінің ақ тілегінде.
Бұл әсем сазды әдемі әнін әр жүрекке жетелеп жеткізіп жүрген өрісті өнер иесі Садықтың шығармашылығына берілген лайықты баға болар деп ойлаймыз. Берікбай ҚАДЫҚОВ,
журналист
Алматы облысы, Қарасай ауданы