Сенбі, 5 мамыр 2012 7:29
Сот реформасын тереңдету Қазақстан Республикасының мемлекеттік саясатындағы басым міндеттер қатарына кіреді. Бұл туралы ШЫҰ-ға мүше мемлекеттер Жоғарғы соттары төрағаларының жетінші кеңесінде Қазақстан Республикасы Жоғарғы Сотының төрағасы Бектас Бекназаров айтты.
Сенбі, 5 мамыр 2012 7:29
Сот реформасын тереңдету Қазақстан Республикасының мемлекеттік саясатындағы басым міндеттер қатарына кіреді. Бұл туралы ШЫҰ-ға мүше мемлекеттер Жоғарғы соттары төрағаларының жетінші кеңесінде Қазақстан Республикасы Жоғарғы Сотының төрағасы Бектас Бекназаров айтты.
Биылғы жылы кеңес Қытай Халық Республикасының астанасы – Бейжің қаласында қытай жағының төрағалығымен өтті. Кеңестің жұмысына Қазақстан Республикасы Жоғарғы Сотының төрағасы Бектас Бекназаров, ҚХР Жоғарғы Халықтық сотының төрағасы Ван Шенцзюнь, Қырғызстан Жоғарғы соты төрағасының міндетін атқарушы Феруза Жамашева, Ресей Жоғарғы сотының төрағасы Вячеслав Лебедев, Тәжікстан Жоғарғы сотының төрағасы Нурсратулло Абдуллоев, Өзбекстан Жоғарғы сотының төрағасы Буритош Мустафаев, ШЫҰ Бас хатшысының орынбасары Парвиз Додов қатысты.
Б.Бекназаров басқарған Қазақстан делегациясының құрамында Жоғарғы Сот жанындағы Соттардың қызметін қамтамасыз ету жөніндегі департамент басшысы Бауыржан Жұмағұлов, Жоғарғы Сот судьясы Моряк Шегенов және Жамбыл облыстық сотының төрағасы Марғұлан Бектұрғанов болды.
ШЫҰ-ға мүше мемлекеттер Жоғарғы соттарының басшылары достық және сындарлы ахуал жағдайында көптеген мәселелерді қарастырып, ШЫҰ елдерінде сот реформасын тереңдету, қылмыстық іс жүргізудегі өкілдікті бөлісу және соттар мен бұқаралық ақпарат құралдары арасындағы өзара қарым-қатынас мәселелерін талқылады.
«11 жыл ішінде әлемдік және өңірлік үдерістерде Шанхай ынтымақтастық ұйымы да өзінің маңызды тарихи рөлін нығайта түсті. Өзара сенімді, ынтымақты, бірлікті, түрлі мәдениеттердің өзара түсіністігін және бірлесе отырып өркендеу үрдісіне ұмтылысты паш еткен ШЫҰ барлық елдер мен халықтардың өзара тең құқықтық және ортақ пайдалы әріптестік алаңына айналды. Өзінің қазіргі стратегиялық міндеттері арқылы ШЫҰ, әсіресе, құқықтық ынтымақтастықты барынша дамытып келеді. Сондықтан, ынтымақтастыққа мүше елдердің сот жүйелері, сөз жоқ, маңызды рөл атқарып отыр», – деді Б.Бекназаров.
Талқылауға арналған тақырыптардың өзектілігін ерекше айта келіп, Бектас Бекназаров сот реформасын тереңдету Қазақстан Республикасының мемлекеттік саясатындағы маңызды міндеттер қатарына жататындығын атап өтті. Қазақстан Республикасы Президентінің бастамасымен басталған сот құқықтық-реформа біздің елімізде 1994 жылдан бастап ойдағыдай жүргізіліп келе жатқанын айтты.
Жамбыл облыстық сотының төрағасы М.Бектұрғанов өз баяндамасында қылмыстық іс жүргізу үдерісінің заңды кепілі ретінде соттық бақылау жайында айтты.
Отырыстың қорытындылары бойынша, Шанхай ынтымақтастық ұйымына қатысушы мемлекеттер Жоғарғы соттарының басшылары бірлескен мәлімдеме қабылдады.
«Егемен-ақпарат».