«Бүгінде мемлекеттік саясаттың негізгі басымдығы халықтың лайықты тұрмыс деңгейін қамтамасыз ету. Республикалық бюджеттен әлеуметтік салаға барлық шығындардың 45% бағытталды. Түрлі бағдарламалар аясында ауқымды әлеуметтік инвестициялар іске асырылуда. Ең бастысы, әлеуметтік саясат теңдестірілген және әлеуметтік асырауда болуға итермелемеуі керек», деді Г.Әбдіқалықова кездесуде.
Түркістан облысында 86 мыңнан астам көп балалы отбасы бар. Бұл республикалық көрсеткіштің 25,4 пайызын құрайды. Олардың 19 мыңы аз қамтылған көп балалы отбасылардың қатарында. 4832 отбасы баспана кезегінде тұр. Бұл орайда Түркістан облысының әкімі Өмірзақ Шөкеев биыл көп балалы 2957 отбасы баспанамен қамтамасыз етілетінін атап өтті. Ол үшін республикалық бюджеттен 3,5 млрд теңге, ал облыстық қазынадан 7,3 млрд теңге қаралып отыр. «Облыста арнайы штаб құрылып, әрбір отбасына әлеуметтік карта жасалды. Үйлерді аралау жұмыстарының нәтижесінде 67,7 мың көп балалы отбасы әлеуметтік картаға енгізілді», деді облыс әкімі.
Халықпен кездесу аяқталғаннан кейін Г.Әбдіқалықова аз қамтылған азаматтарға әлеуметтік қолдау көрсету, мемлекеттік шараларды түсіндіру бойынша жеке қабылдау өткізді. Күлтөбе қалашығындағы ғылыми-реставрациялық жұмыстармен танысты. Мемлекеттік органдардың, ведомствоға бағынысты мекемелердің және ЮНЕСКО-ның халықаралық сарапшыларының өкілдерімен кездесуде Қазақстанның тарихи мұрасы – Қ.А.Ясауи кесенесін сақтау мәселелері талқыланды. Кеңес қорытындысы бойынша нақты тапсырмалар берілді. Ал Еңбек және халықты әлеуметтік қорғау министрі Б.Сапарбаев Халықты жұмыспен қамту орталығының қызметін тексеріп, жаңа форматта атаулы әлеуметтік көмек көрсету процесімен танысты. Бүгінгі таңда облыста АӘК алушылар саны 207 мыңнан 283 мың адамға дейін артқан, осы мақсаттарға қаржы қажеттілігі 14 млрд-тан 45 млрд теңгеге дейін өсті. Сондай-ақ жұмыс тобы «Кентау трансформатор зауыты» АҚ базасында аудандар, қалалар әкімдерімен, өнеркәсіптік кәсіпорындардың басшыларымен, бизнес-құрылымдар, кәсіподақ ұйымдары басшыларымен кеңес өткізді. Г.Әбдіқалықова өнеркәсіптік кәсіпорындардың, бизнес-құрылымдардың басшыларын өздерінің табысы төмен қызметкерлерін қолдауға, тұрғын үй сатып алуға көмектесуге, оларды жөндеуге қаражат бөлуге, баспана несиелері бойынша бастапқы жарналарды төлеп беруге шақырды. Мұқтаж жандарға қол ұшын беріп жүрген кәсіпкерлер де баршылық. Бүгінде өңір кәсіпкерлері 11 көп балалы отбасын тұрғын үймен қамтамасыз еткен. Мысалы, Қазығұрт ауданының кәсіпкері С.Ертаев көп балалы Ержановтар отбасына үй сатып алып берді және Түркияда науқас баланың отбасына операция жасауға 4 млн теңге бөлді.
Денсаулық сақтау, білім беру саласының қызметкерлерімен бірқатар кездесулер өткізіп, азаматтарды қабылдаған жұмыс тобының мүшелері, сондай-ақ әлеуметтік нысандармен, Түркістанда қызу қарқын алған құрылыс жұмыстарымен танысты.
Премьер-Министрдің орынбасары Гүлшара Әбдіқалықованың жұмыс сапары Жамбыл облысында жалғасты. Вице-премьер әуелі аймақтағы әлеуметтік аз қамтылған отбасылардың шаңырағына ат басын бұрды.Атап айтар болсақ, тараздық көп балалы ана Ұлдана Қозиева жұбайы екеуі 6 бала тәрбиелеп отыр. Үлкен ұлдары 2003 жылы туған, Жамбыл политехникалық колледжінің 1-курс студенті. Ал үш баласы мектеп оқушылары десек, екеуі балабақша тәрбиеленушілері. «Алтын алқа» иегері Ұлдана Берікқызы бала тәрбиесімен үйде болса, жұбайы – күзетші. Жалақысы – 43 мың теңге.
Бұл отбасының балалары мектепте ыстық тамақпен және қысқы киіммен қамтылған. Бұған дейін отбасының айлық жиынтық табысы 75 919 теңгені құраса,
1 сәуірден бастап ол 231 481 теңгені құрамақ. Оған мемлекеттік атаулы әлеуметтік көмек жүйесіндегі оң өзгерістер себеп болып отыр.
Сондай-ақ Гүлшара Наушақызы тараздық көп балалы ана Айнұр Науатованың және көмекке мұқтаж Зухра Каримованың шаңырақтарында болып, жағдайларымен танысты. Г.Әбдіқалықова мұқтаж жандарға қандай көмек қажет екенін біліп, тілек-ниеттері назарға алынатынын жеткізді.
Айта кетейік, Жамбыл облысында 1 сәуірден бастап атаулы әлеуметтік көмекті 29 650 отбасы алуда. Жан басына шаққандағы табысы кедейлік шегінен төмен 29 650 отбасының әлеуметтік картасы түзіліп, онда барлығы 150 400 адам қамтылған.
Премьер-Министр орынбасарының аймақтағы сапары халыққа қызмет көрсету орталығында жалғасты. Орталық жұмысымен жан-жақты танысқан Гүлшара Наушақызы әлеуметтік әлсіз топ өкілдерін жұмыспен қамту деңгейін назарда ұстауды тапсырды.
Халыққа қызмет көрсету орталығы 2006 жылғы 11 қарашада пайдалануға берілген. Жалпы аумағы 805,9 шаршы метрді құрайды. Барлық қажетті техникалық құрал-жабдықпен қамтамасыз етілген орталық 2018 жылы 91 100 адамға қызмет көрсеткен. Ал үстіміздегі жылдың І тоқсанында 20 700 адам орталық арқылы мемлекеттік көрсетілетін қызметке жүгінген. Орталықта 89 қызметкер жұмыс істесе, барлығы 621 қызмет түрі көрсетіледі.
Келесі кезекте Вице-премьер Тараз қалалық халықты жұмыспен қамту орталығына барды. Орталық ғимаратының жалпы аумағы 1 246,7 шаршы метрді құрайды. Мұнда өткен жылы
12 375 адамға қызмет көрсетілген. Нысан барлық қажетті техникамен жабдықталған. Мекемеде 52 адам қызмет етеді.Премьер-Министрдің орынбасары Г.Әбдіқалықованың аймаққа жұмыс сапары ертең жалғасады.
Ғалымжан ЕЛШІБАЙ, Хамит ЕСАМАН,