Г.Әбдіқалықова Жамбыл облысындағы жұмыс сапарының екінші күнін Қазфосфат ЖШС-ның Жаңа Жамбыл фосфор зауытынан бастады. Онда қала және аудан әкімдері, ірі кәсіпорын жетекшілері, бизнес өкілдері және кәсіподақ ұйымдарымен кездесу ұйымдастырылды. Г.Әбдіқалықова қазіргі таңда ел көлемінде кәсіпкерлер өздерінің жоғары әлеуметтік жауапкершіліктерін танытып, көп балалы және аз қамтылған отбасыларға көмек беріп жатқанына тоқталды. Айта кетейік, Жамбыл облысы бойынша қазіргі кезде 14 кәсіпорында 272 көп балалы қызметкер еңбек етеді. Оның 217-сінің жеке баспанасы жоқ. Мысалы, «Жамбыл электр желісі жүйелері» ЖШС-да еңбек ететін 60 көп балалы қызметкердің 49-ының жеке баспанасы жоқ. Вице-премьер кәсіпорын басшыларынан бұл қызметкерлердің әлеуметтік мәселелерін шешіп қана қоймай, олардың жұмыс кестесін де қолайлы жағдайға ыңғайластырып беруін сұрады.
Келесі кезекте Г.Әбдіқалықова бастаған жұмыс тобы Ы.Дүкенұлы атындағы қалалық мәдениет үйінде тараздық тұрғындармен кездесті. Басқосуға көп балалы аналар, аз қамтылған отбасы мүшелері, еңбек ардагерлері, мүмкіндігі шектеулі азаматтар және білім беру, денсаулық сақтау, мәдениет салаларының қызметкерлері қатысты.
Басқосуда сөз алған Гүлшара Наушақызы Елбасының «Әлеуметтік қамқорлық» жаңа әлеуметтік шараларының негізгі бағыттары қазіргі таңдағы әлеуметтік-саясат шеңберінде, әрбір тұрғынның тұрмыс сапасын арттыру мақсатында жүзеге асырылып жатқанын атап өтті. Кездесу соңында тұрғындар үкіметтік жұмыс тобының мүшелеріне көкейлеріндегі сауалдарын жолдап, нақты жауаптар алды.
Бұдан соң Премьер-Министрдің орынбасары Тараз қалалық №5 емханаға ат басын бұрды. Емдеу мекемесінің жұмысымен танысқан Г.Әбдіқалықова Жамбыл облысындағы алғашқы медициналық-санитарлық көмек көрсету мәселелері бойынша жиын өткізді. Бүгінгі таңда облыс бойынша халыққа денсаулық сақтау жүйесінің 30 аурухана және 148 амбулаторлық-емханалық ұйымдары медициналық көмек көрсетуде. Бастапқы медициналық-санитарлық көмек көрсететін дәрігерлер үлесі барлық дәрігерлердің 60,4 пайызын құрайды. Қазіргі кезде аймақта мемлекеттік-жекеменшік әріптестік шеңберінде 31 жоба іске асуда. Сондай-ақ республикалық бюджет есебінен облыс орталығында 200 орындық онкологиялық диспансер құрылысы жүргізілуде. Вице-премьер алғашқы медициналық-санитарлық көмек көрсету инфрақұрылымының даму деңгейіне көңіл бөлді. Күннің екінші жартысында Гүлшара Наушақызы Жамбыл жоғары политехникалық колледжінің материалды-техникалық базасымен танысып, колледж студенттерімен еркін форматта кездесу өткізді. Кездесуге қатысқан жастар мемлекеттің жүргізіп отырған жастар саясатын қолдайтындарын жеткізіп, орамды ойларын ортаға салды. Жиында адам капиталының дамуының негізі болып саналатын білімнен бастап, әлеуметтік-еңбек саясатының өзекті қырлары талқыланды. Жамбыл ауданының тұрғыны Маханбет Рахымжанов жастарды жұмыспен қамту мәселесінің өзектілігіне тоқталып, бірқатар ұсынысын жеткізді.
Жамбыл облысындағы жұмыс сапарының соңында Премьер-Министрдің орынбасары облыс басшылығына бірқатар нақты тапсырма жүктеді.
Жамбыл облысы