Сенбі, 4 тамыз 2012 7:40
Миллионнан астам тұрғыны бар шаһардың тыныштығын күні-түні қорғайтын тәртіп сақшыларының өздерінің кәсіби міндетіне деген жоғары жауапкершілігі қаншама ауыр қылмыстың жолын кесті десеңізші?!
Сенбі, 4 тамыз 2012 7:40
Миллионнан астам тұрғыны бар шаһардың тыныштығын күні-түні қорғайтын тәртіп сақшыларының өздерінің кәсіби міндетіне деген жоғары жауапкершілігі қаншама ауыр қылмыстың жолын кесті десеңізші?!
Алматы қаласының Түрксіб ауданында қоғамдық тәртіпті қорғауды қамтамасыз ету қызметіне кіріскен «Боран-170» патрульдік экипажына өткен сенбіде таңғы тоғызда қарулы шабуыл жасалды. Бекмаханов көшесінде жол шетінде тұрған күдікті «Хюндай» көлігіндегілердің құжаттарын тексермек болғанда, олар полицейлерге тұтқиылдан оқ жаудырған. Басына тиген оқтан аға лейтенант Ержан Қайрақбаев бірден көз жұмып, оның әріптесі лейтенант Ерназ Қожахметов ауыр халде ауруханаға жеткізілгенімен, оны құтқару мүмкін болмады.Алматы қалалық ІІД баспасөз қызметінің жетекшісі, полиция майоры Салтанат Әзірбектің айтуынша, бұл оқиғаға қатысы бар қарулы қылмыскерлерді құрықтау мақсатында тәжірибелі қызметкерлерден шұғыл түрде жедел-тергеу тобы құрылған. Сөйтіп «Құрықтау» арнаулы жоспары бойынша алты қылмыскер «Ахселкент» шағын ауданындағы көп қабатты үйдегі пәтерлердің бірінде жасырынғандығы анықталды. Ауыр және аса ауыр қылмыстары үшін бірнеше жылын темір торда өткізгендер бостандыққа шыққан бойда бастары қайтадан қосылып, «ескі әдеттерін» қайта жалғастырған.Оңтүстік астанадағы бірнеше ірі кәсіпорындарға қарақшылық шабуыл жасаған қылмыстық топтың мүшелерін құрықтау Алматы қалалық ішкі істер департаментінің бастығы Ерлан Тұрғұмбаевтың жетекшілігімен өтті. Арнаулы операцияға ІІМ-нің «Сұңқар» және «Арлан» топтары мен жедел әрекет ету отряды қызметкерлері қатысты. Қарақшылық шабуылмен айналысқан қылмыстық топты тұтқындау іс-шарасы басталмас бұрын бұл үйлердің 162 тұрғыны қауіпсіз жерге орналастырылды. Содан соң қылмыскерлерден өз еріктерімен беріліп, қаруларын тастау талап етілді. Алайда, бұл ұсынысқа мойын бұрмай, қарсылық көрсеткен қарақшыларға қару қолданылып, алты қылмыскердің көзі жойылды. Ал жалға алынған бір бөлмелі пәтерді тінту барысында екі «Калашников» автоматы, бір аңшы мылтығы, екі тапанша, бір револьвер, оқ дәрілер табылды, дейді Салтанат Әзірбек.Республикадағы түзеу мекемелерінің бірінде қарақшылық шабуыл, ұрлық, есірткі өткізу және басқа да ауыр қылмыстары үшін жазасын өтеген қылмыстық топ мүшелерінің Шығыс Қазақстан, Жамбыл және Алматы облыстарының тұрғындары екендігі анықталды. «Ахселкент» тұрғын үй кешеніндегі үйдің төртінші қабатында орналасқан бір бөлмелі пәтердегі қылмыскерлерді құрықтауға екі сағатқа жуық уақыт кетті. Арнаулы операция барысында полиция қызметкерлері мен бейбіт тұрғындар арасында зардап шеккендер болған жоқ. Қазіргі кезде осы қылмыс бойынша тергеу жүргізілуде. Сөз реті келгенде айта кететін тағы бір жәйт, қалада тіркелетін қылмыстың жартысынан астамын жақын шетелдерден, республиканың өзге аймақтарынан келгендер мен заңсыз мигранттар жасауда. Статистикалық мәліметтерге қарағанда, Алматыға тәулігіне сырттан екі жүз мыңдай автокөлік қатынайды екен. Өкінішке орай, олардың көпшілігі тіркелмейді.Тамыз айының алғашқы күні қала әкімі Ахметжан Есімовтің қатысуымен өткен жиында бұл мәселеге баса назар аударылды. Әкімнің пікірінше, құқық қорғау органдары оңтүстік астанаға келетіндерге қатысты жұмысты одан әрі жетілдіруі тиіс. Анығырақ айтқанда, жол полициясы басқармасы қалаға енетін көлікке бақылауды күшейткені жөн. Сонымен қатар, мұндай маңызды іс-шарада құқық қорғау органдарына көмек көрсету жөніндегі қоғамдық кеңес құру қарастырылмақ.Мәселен, қанды қол қарақшылардың көзі жойылған шағын ауданда отызға жуық пәтердің жалға берілгені анықталды. Алайда, ондағы тұрғындар туралы мәлімет жоқ. Соған орай, қала басшысы аудан әкімдеріне ІІД мен ПИК-термен бірлесіп, жалға берілетін пәтерлердің қоры бойынша ақпаратты жүйелендіруді тапсырды.Бақыт БАЛҒАРИНА,«Егемен Қазақстан».Алматы.