Дарын жас таңдамайтындығын Жаннеттің жансарай бағы іспеттес көрмесінен көруге болады. Бүгінде Т.Жүргенов атындағы Қазақ ұлттық өнер академиясында оқитын талантты қыздың табыстары қомақты. Канагава қаласында Жапония мен Азия елдері жас суретшілерінің арасында өткен жарыстың бас жүлдегері болса, ІХ халықаралық “Шабыт” конкурсының “Бейнелеу өнері” номинациясының Гран-Приін жеңіп алып, “Дарын” Мемлекеттік жастар сыйлығының лауреаты атанған.
Бұл Жаннеттің алғашқы көрмесі емес. Оның “Дебют”. Менің алғашқы нүктем” деп аталатын жеке көрмесі Моңғолияның ұлттық өнер галереясына қойылса, “Тамыр” мен “Ою түс” атты дербес көрмелері арқылы астаналықтарға өз әлемін паш еткен. Ал бұл көрмені қазақтың қарақат көз суретшісі Қазақстанның ЕЫҚҰ-ға төрағалық етуіне және еліміздің Біріккен Ұлттар Ұйымына кіруінің 18 жылдығына арнап отыр екен.
Төрт жасынан қолына қылқалам алған Жаннет қазақтан шыққан белгілі ғалым, суретші Жанатхан Сағидан Улан-Батыр қаласында (Моңғолия) құрған “Дарын” атты дарынды балалар орталығында шұғылданған. Осы орталықты құрушылардың пікірінше, білім беруге деген қазіргі көзқарас әлдеқашан ескірген және қазіргі білім беру парадигмаларын алмастыра алатын мүлде жаңа педагогикалық тұжырымдамалар мен идеялар қажет. Сондықтан осы ойды іске асыру үшін жаңа мектептің жұмысына философтар, математиктер, педагогтар мен шығармашылық қайраткерлері тартылған.
Осындай ортада өскен, соны үрдістен сусындаған суретші де өз ұстаздарының ұстанымын ақтағанын көрмеге қойылған кескіндемелерден жазбай танисың. Пәлсафаға толы картиналарды жәй тамашалап ғана қоймай, тылсымына бойлап, ішіне бүккен идеяларды оқуға ұмтыла бастағаныңды байқамай қаласың.
Жаннет өз жұмыстарында жалпы адамзаттық мәселелерді, әлем жаратылысының күйініші мен драматизмін өрнектеу әдісі ретінде гротескалық образдарды пайдаланады. Әйтпесе, тіршілік ырғағы үдеп бара жатқан, бейнебаяндық сананы сіңіріп болған телевизиялық бағдарламалар салтанат құрып тұрғанда мына беймаза әлемге үніңді қалай естіртуге болады?
Иә, ол “Атаусыз”, “Қысым”, “Қарсы батыр”, “Рухтар керуені”, “Әлі ешкім білмейді” атты суреттері арқылы бізді өзіміз құрып жатқан ессіз әлемнен сақтандыруға ұмтылады. Солай бола тұра “Мәңгілік сұрақ”, “Модельянидің әсерімен”, “Нәзік Хамаль” тәрізді туындылары поэзияға, романтика мен махаббатқа толы. Сондай-ақ оның дүние жаратылысы туралы ойлары “Шағылысу”, “Абыздар” триптихі, “Жеті төбе” туындыларынан көрінсе, Адам Ата мен Хауа ана ұрпақтарының өзара қарым-қатынасы “Инь. Янь” диптихі, “Копромисс”, “Портрет” сериясы, “Бір батырдың жиырма арбауынан” аңғарылады.
Жаннет Әбіштің жұмыстары туралы өнертанушылар: “Біз сөзсіз, айрықша көркемсурет феноменінің шығармашылық жолының басталуын көріп отырмыз. Ол өзінің жаңа әрі тосыннан адам жаны мен дүние жаратылысы метамарфозаларын іске асыруымен таңдандыра отырып әрі дами беретін болады” деп баға беруде.
Алматы.
Айнаш ЕСАЛИ.