Кеше Парламент Сенатының Төрағасы, ЕҚЫҰ Парламенттік Ассамблеясы Төрағасының орынбасары Қасым-Жомарт Тоқаев Еуропа Кеңесі Парламенттік Ассамблеясының төрағасы Мевлют Чавушоглумен кездесті, деп хабарлады осы палатаның баспасөз қызметі.
Тараптар Қазақстан Парламенті мен ЕКПА арасындағы өрістеп келе жатқан өзара іс-қимыл үдерістерін қанағаттанғандықпен атап өтіп, екі институт арасындағы ынтымақтастықтың өзара түсіністік пен сенім тұрғысында дамып келе жатқанына тоқталды.
“Біз ЕКПА-ны еуропалық кеңістіктегі маңызды саяси әріптес ретінде қарастырамыз. Қазақстан Парламентінің депутаттары өздерінің еуропалық әріптестерімен халықаралық саясаттың ауқымды салалары бойынша сындарлы үнқатысуды дамытуға мүдделі”, – деді Қ.Тоқаев. Сенат Төрағасы Қазақстан Парламентінің атынан Ассамблея жұмысында біздің елімізге тұрақты түрде қолдау білдіргені үшін ризашылық білдірді.
“Сіз Парламенттік Ассамблея жоспарлары мен шараларын жүзеге асыру барысында қазақстандық тараптың жан-жақты көмегіне сенім арта аласыздар”, – деді Қ.Тоқаев. Қазақстан Сенатының Төрағасы ЕКПА төрағасын ЕҚЫҰ-ға Қазақстанның төрағалық етуіне байланысты шараларды әзірлеу мен өткізуге байланысты Қазақстан Парламентінің жұмыстарынан хабардар етті. Атап айтқанда, ол үстіміздегі жылы мамырда Алматыда “ЕҚЫҰ-ның еуразиялық өлшемі” Трансазиялық парламентшілер жиыны өтетіні туралы мәлімдеп, М.Чавушоглуды осы шараға қатысуға шақырды.
Кездесу соңында тараптар Қазақстан мен Еуропа Кеңесі арасындағы парламентаралық ынтымақтастықты қарқынды дамыту саяси үнқатысу мен түрлі саладағы экономикалық өзара іс-қимылды нығайтуға ықпал ететініне сенім білдірді.