Ел тағдырына әсер етеді

Ең алдымен осы іс-шара­ның басты модераторы, Батыс Қазақ­стан мемлекеттік меди­ци­на университетінің аға оқы­ту­шысы Бекзат Молдин мем­лекеттің одан әрі дам­уы сатысында президенттік сай­лау­дың атқаратын рөлі жоғары екенін атап өтті. Бұдан әрі ол өзінің бұған дейінгі жоғары оқу орнындағы іс-тәжірибесінен нақ­ты мысалдар келтіре ке­ліп, қай кезде де студенттер мен жастардың сайлауға деген қызығушылығы мен бел­сен­ді­лігі жоғары болып келгенін алға тартты.  Атап өтерлік мәселе, дөңге­лек үстелге қатысушылардың басым бөлігі І курс студенттері екен­дігі де оның басты ерек­ше­лі­гі деуге болады. Соның ішінде Малика Орынова мен Дамир Жолдасбаев секілді студенттер мемлекет тағдырына тікелей әсер ететін сайлауға тұңғыш рет қатысқалы отыр­ға­нын айта келіп, оған сырттай бақылаушы болмай, тікелей араласу төл парыздары екенін жеткізді. Олардың мұндай ойлы пікірлері өзге де дөңгелек үстелге қатысу­шы­лар тарапынан қолдау тапты. 

Сондай-ақ философия ғы­лым­­дарының докторы, про­фес­­сор Алтай Тайжанов тиіс­­ті заң талаптарына сәй­кес кез келген республика азама­ты­ның президенттік сай­лау­ға қатысып, өз еркімен таңдауын білдіре алуы, өзін толғандырған мәселелерді жоғары мем­ле­кет­тік органдарға жет­кізе білуі мемлекеттің демок­ратиялық тұрпатына сәй­кес келеді деген ой қорытты.

Дөңгелек үстел мәжілісі кезінде ортаға: «Сіз кімге дауыс бересіз?» деген сауал тасталып, оған орнықты да тұжырымды жауаптар қайтарылды. Бұл ретте әрбір сайлаушының прези­дент­тік­ке кандидаттардың сайлауалды бағдарламалармен танысуына толық мүмкіндіктері бар. Соған сәйкес әр азамат өз таң­дауын жасай алады. Әрине мұндай жағдайда басты ба­сым­дық ел мен халық мүддесін қорғай алатын кандидаттар мен тұлғаларға берілетіні талас туғызбайды. 

М.Оспанов атындағы Ақтө­­бе мем­ле­­кеттік меди­ци­на уни­вер­ситетінде ұйым­дас­ты­­­рылған дөңгелек үс­тел­де айтылған басты тұжы­рым­дар­дың бірі осындай. Сайлауға қа­­тысу – әркімнің өз еркі, өз конституциялық құқығы. Мұны ешкім жарлықпен неме­се декретпен бекіте алмайды. Қалай дегенде де қазіргі кезде қазақстандықтардың ең лайықты тұлғаларға дауыс беруі өте маңызды болып қала береді де­ген түйін жасалды дөңгелек үс­тел қорытындысында. АҚТӨБЕ