– Медиация – Ассамблея айналысатын маңызды істің бірі. Медиатор – тәуелсіз тұлға. Медиацияға қатысушы тараптар медиатордың тәжірибесіне, білімі мен іскерлігіне сүйене отырып, өзара тиімді шешімге өз бетінше келеді, – дейді «Қоғамдық келісім» КММ медиация кабинетінің меңгерушісі Сәния Саталиева.
Қазіргі таңда Қазақстан халқы Ассамблеясының жанындағы медиация кабинеті 3 респубикалық және 1 жергілікті медиация орталықтарымен тығыз қарым-қатынаста жұмыс жүргізіп отыр. Бұл орталықтардың кәсіби медиаторлары мен Қазақстан халқы Ассамблеясының қоғамдық медиаторлары тегін медиация рәсімдерін жүргізеді. Облыс тұрғындарын ақпараттандыру мақсатында телеарнадан арнайы «жүгіртпе жол» беріліп отырады. Өз жұмыстарын халық және ұжым арасына «Ашық есік күндері» қоғамдық қабылдау, көшпелі ақпарат-насихаттық жұмыстары, медиаторлар отырысы, семинар-тренинг және дөңгелек үстел форматында жүргізетін медиаторлар аудан, қалаларды аралап қызмет етеді. Медиация бағытындағы жұмыстарды одан әрі жандандыру үшін Қазақстан халқы Ассамблеясының жанында құрылған көшпелі ақпараттық-насихаттық топтар елді мекендерді аралап, соның ішінде Жаңаөзен қаласы, Құрық кенті, Маңғыстау, Мұнайлы және Бейнеу аудандарына іссапармен барды.
Медиация кабинетіне келушілер санының көбеюі ел арасында медиацияға деген қажеттіліктің бар екендігін аңғартады. Келушілердің шешімін таба алмай жүрген негізгі мәселелері кредиттік ұйымдарға, отбасы проблемаларына, сақтандыру мекемелеріне, еңбек даулары мен жалақы төлемеуге, білім беру және денсаулық сақтау мекемелеріндегі кейбір мәселелерге қатысты болып келеді. Медиация кабинетіне 2016 жылы – 56 адам, 2017 жылы – 301, ал 2018 жылы 443 адам келген.
– Қазір жасөспірімдердің проблемалары ересектердің алаңдаушылығын тудырады, сондай-ақ мектеп оқушылары арасында жанжалдар болмай тұрмайды. Өңірлердегі мектептер мен колледждерде оқитын жасөспірімдер арасында тәртіп бұзушылық түрлерінің байқалуына байланысты білім беру ұйымдарының және ҚХА медиация кабинеттері мамандарының бірлескен медиация дамыту жұмыстары ұйымдастырылуда, – дейді Маңғыстау облысы Қазақстан халқы Ассамблеясы хатшылығының меңгерушісі Г.Исмурзина.
Алдағы уақытта жоба аясында кәсіби медиаторлар ата-аналарға, мектеп психологтарына, тәрбие ісімен айналысатын мамандарға арнайы семинарлар ұйымдастырып, даулар мен кикілжіңдердің алдын алу әдістемелерін түсіндіруді жоспарлауда. Оқу орындарынан бөлек ауруханалар мен емханаларда, өзге де ұжымдарда түсіндіру, кикілжіңдерді болдырмау бағытындағы жұмыстар жүргізілуде.
Маңғыстау облысы