Кездесуге Парламент Мәжілісінің депутаты, «Возрождение» қазақстандық немістер қауымдастығы Қамқоршылар кеңесінің төрағасы Альберт Рау, Федералды үкіметтің өкілетті хатшысы Себастьян Клапперт, Қазақстандағы Германия елшілігі саяси бөлімінің жетекшісі Валентина Гольдманн қатысты. Жиын барысында Қазақстан халқы Ассамблеясы Қоныс аударушылар мен аз ұлттар жөніндегі Федералдық үкімет арасындағы өзара байланысты бекіту, қазақ еліндегі этностық немістер мен Германиядағы қазақтарды қолдау бойынша екі ел арасындағы ынтымақтастықты нығайту және кеңейтуге қатысты мәселелер мен негізгі аспектілер талқыланды.
– Қазақстан барлық қарым-қатынас кешені бойынша Германиямен ынтымақтастықты дамытуға баса мән береді. Саяси диалог ашық және сенімді сипатқа ие. Германия Қазақстанның жетекші экономикалық серіктестерінің қатарына кіреді. Екі ел арасындағы сауда-экономикалық қатынастар өзара іс-қимылдың тұрақты дамуына және жаңа мүмкіндіктерін іздеуге серпін береді. Неміс инвестициясының шамамен 90 пайызы Қазақстан экономикасының шикізаттық емес секторына бағытталады. Қазақстанда бірлескен кәсіпорындарды, неміс компаниялары мен банктердің өкілдіктерін қоса алғанда, Германия капиталының қатысуымен 900-ден аса экономикалық құрылым тіркелген. 450-ге жуық германиялық кәсіпорын белсенді жұмыс істейді. Ынтымақтастық өңдеуші өнеркәсіп, құрылыс, көлік және байланыс, ауыл шаруашылығы, әлеуметтік және дербес қызметтер және экономиканың басқа да салаларында жүзеге асырылады, – деді Қазақстан халқы Ассамблеясы Төрағасының орынбасары Жансейіт Түймебаев.
Сонымен қатар Жансейіт Түймебаев меймандарға әлемдік саясатта баламасы жоқ бірегей қоғамдық келісім институты – Қазақстан халқы Ассамблеясының жұмысымен жан-жақты таныстырды. Оның айтуынша, Қазақстанда ұлты неміс шамамен 180 мың азамат өмір сүреді және Германияға 900 мыңнан аса адам қоныс аударған. Бұған қоса Германияда 300-ге жуық қазақстандық білім алып жатыр. Бұл – екі елді байланыстырып тұрған дәнекер.
Өз кезегінде Қоныс аударушылар мен аз ұлттардың істері жөніндегі Федералдық үкіметтің өкілетті уәкілі Бернд Фабрициус Бейбітшілік пен келісім сарайы ашықтық пен қонақжайлылықтың символы екенін айтып, жылы қабылдағандарына ризашылығын білдірді.
– Сіздің ұлттар достығының ұйытқысы болып отырған Ассамблея туралы кеңінен баяндағаныңыз өте мазмұнды болды. Қазақ халқына осындағы этностық немістерге көрсетіп отырған бауырмалдығы мен үлкен қолдауы үшін Германия үкіметінің атынан алғысымды білдіремін. Екі елдегі өмір сүріп жатқан және қоныс аударған ағайын – қазақ-неміс достығын берік ұстап тұрған сенімді көпір. Біз Қазақстанды тұрақтылықтың айқын үлгісі ретінде білеміз. Сол тұрақтылықтың негізі ашықтық пен экономикалық дамуға көрсетілген қолдауды жоғары бағалаймыз, – деген Бернд Фабрициус сөзінің соңында Берлинге қонаққа келуге шақырды.
Қазақстандағы неміс диаспорасы мүдделерін қолдау мақсатында Қазақстан-Германия Үкіметаралық комиссиясы қызмет атқарады. 20 мамыр күні Нұр-Сұлтан қаласында осы комиссияның 17-ші отырысы өтті.