Ашық пікір алаңы ретінде өткен жиынға «Ақ жол» партиясы төрағасының орынбасары, ақын, «Қазақ үні» газетінің басшысы Қазыбек Иса мен партия төрағасының орынбасары Дмитрий Васильев қатысып, сөз сөйледі. Сондай-ақ Қызылорда облысының «Рухани жаңғыру орталығы» өкілдері, Қорқыт ата атындағы ҚМУ тарихшылары мен оқытушылары өз баяндамаларын жасап, ой-пікірлерін білдірді. Басқосуға Қазақстандағы президенттік сайлауды xалықаралық байқаушылар тобы да қатысты.
Дөңгелек үстел барысында «Руxани жаңғыру» бағдарламасының аясындағы «Ақ жол» партиясының атқарған істері, ұлттық мүддеміздің қорғалуы, мемлекеттік тілдің дамуы, мәдениетіміздің мәйекті мәселелері талқыланды. Білім саласындағы қордаланған мәселелер де өткір айтылды. Әсіресе мұғалімдер қауымы бастауыш сыныптарда жаңартылған бағдарлама қазақ әдебиеті сабағының бір сағатын қиып кеткеніне қынжылыс білдірді. Қ.Иса бастауыш сыныптардағы жаңартылған бағдарлама кесірінен бұрын аптасына төрт рет өтіп келген «Әдебиеттік оқу» сабағының қазір үш ретке түсіп қалған мәселесі партия фракциясында қаралатынын мәлімдеді.
Сонымен қатар еліміздің басқа өңірлерінде де үгіт-насихат жұмыстары жалғасын тауып, аймақтық қоғамдық штаб өкілдері түрлі іс-шаралар өткізуде. Нәтижесінде жұрт кандидаттың ұстанымдарынан хабардар болып қалды.
* * *
«Ауыл» халықтық-демократиялық патриоттық партиясы атынан президенттік сайлауға түсіп жатқан Төлеутай Рақымбеков Алматы қаласында да бірқатар кездесу өткізді. Жұмыс сапарын кандидат Ө.Оспанов атындағы Қазақ топырақтану және агрохимия ғылыми-зерттеу институтын аралаудан бастады. Сонымен қатар қоғамдық штаб өкілдері арнайы көрмені, жатақханаларды, химиялық талдау зертханасын тамашалады.
Қазақ топырақтану және агрохимия ғылыми-зерттеу институты жердің беткі қабатын зерделеп, оның құнарлылығын арттыру технологиясын әзірлейді. Тіпті мұнда әлемде теңдесі жоқ бастамалар да бар. Соның нәтижесінде қазір ауыл шаруашылығында өнімділік артып, саланың бойына қан жүгіре бастаған. Ал Т.Рақымбеков осындай ғылыми мекемелерге қолдауды аямау керектігі жайында үнемі айтады. Мұнда ғылыми жұмыспен айналысуға барлық жағдай бар. Яғни, заманауи құрал-жабдықтармен қамтылған. Алатын айлықтары әлдеқайда жоғары. Тіпті жас мамандарға уақытша баспана да беріледі. Президенттіктен үміткер енді осындай жағдайды басқа да ғылыми-зерттеу мекемелерінде жасау керек дейді. Сонда ғана аграрлық ғылым мен өндіріс алға басарына сенімді.
Аграрлық ғылым саласының өкілдерімен кездесу барысында салаға жас мамандарды тарту, жұмыссыздықпен күрес және жемқорлықты жою мәселелері де сөз болды.
Сонымен қатар Қазақ инженерлік институтында Т.Рақымбеков сайлаушылармен кездесіп, сұрақтарына жауап берді. Ол сайлауалды бағдарламасындағы басым бағыттар туралы кеңінен баяндап, Қазақстанның агроөнеркәсіп кешенін дамытуды ұсынды. Бұған қоса жол, су, электр қуаты, байланыс, интернет мәселесі өзекті екенін жеткізді. * * *Кәсіподақтар федерациясынан президенттікке кандидат Амангелді Таспиховтың Түркістан облысы және Шымкент қаласы бойынша қоғамдық аймақтық штабының мүшелері сайлауалды кездесулер өткізіп жатыр. Түрлі еңбек ұжымдарын қамтыған жиындардың бірі Шымкентте орналасқан «Таған» ЖШС асфальт зауытында өтті. Кеңсе қызметкерлері және индустриялық-экономикалық аймақта жұмыс істеп жатқан зауыт жұмысшыларынан құралған қауым 40 адамды құрады.
Кездесуді мекеме басшысы Әбдіманап Мамытбаев ашып, кәсіпорын жұмысымен қысқаша таныстырды. Ал президенттіктен үміткер А.Таспиховтың бағдарламасы туралы аумақтық кәсіподақтар бірлестігі төрағасының орынбасары, сенім білдірілген өкіл Серік Әуесханов айтып берді. Ол кандидат тұғырнамасында көрсетілген қарапайым жұмысшы мәртебесін көтеруге бағытталған ұсыныстарды ортаға салды. Лайықты жалақы төлеу, еңбек миграциясы, еңбек құқы мәселелерін жан-жақты түсіндірді. Кеңсе қызметкерлерімен кездесуде мекеменің бас есепшісі Ілияс Мошқалов және индустриялық-экономикалық аймақтағы жұмыс істеп тұрған зауыттың учаске басшысы Дәрмен Әлімсақов еңбек адамының мүддесін қорғауда қашанда аянып қалмайтын кәсіподақтың атқарған жұмыстарын саралай келе, алдағы мүмкіндіктерін де таратып айтты.
Сонымен қатар «Мемлекеттік, банк және қоғамдық қызмет көрсету қызметкерлерінің салалық кәсіподағы» қоғамдық бірлестігінің Түркістан облыстық және Шымкент қалалық филиалының төрайымы Күлдар Есебаева облыстық мемлекеттік мұрағат қызметкерлерімен кездесіп, насиxат жұмысын жүргізді. Ол кандидаттың бағдарламасына сүйеніп, еңбек адамдарына лайықты еңбекақы төленумен бірге қауіпсіз еңбек жағдайларын да жасау өте маңызды шарт екенін мәлімдеді.
* * * Қазақстан Коммунистік халық партиясы атынан сайлауға түсіп жатқан Жамбыл Ахметбеков Өскемен қаласында Экономика және қаржы колледжінің профессорлық-оқытушылар құрамымен және студенттерімен кездесті. Кандидат бұл басқосуда партия Парламент Мәжілісінен орын алып отырған саяси ұйым екенін және мемлекеттік деңгейде халық мүддесін қорғайтынын айтты. Сөйтіп сайлауалды тұғырнамасының басым бағыттарын таныстырып, оның коммунистік идеология ұстанымдарынан бастау алатынын тілге тиек етті.Ж.Ахметбеков Коммунистік халық партиясы агроөнеркәсіп өнімдеріне тұтынушылық сұранысты ынталандыру бағдарламасымен бірге кедейлікпен күрес бағдарламасын қабылдауды бірнеше рет ұсынғанын және оның жүзеге асырылуы үшін жұмыс істейтінін ерекше атап өтті. Кездесу соңында спикер сайлаушыларды 9 маусым күні өтетін кезектен тыс президент сайлауында белсенді болуға және лайықты үміткерге дауыс беруге шақырды.
Сондай-ақ Нұр-Сұлтан қаласындағы насихатшылар тобы белсенді жұмыс істеп, өз кандидаттарының негізгі ұстанымдарын халыққа барынша жеткізуде. Олар кезіккен жұртқа үгіт парақшаларын және партия журналдарын таратып, әңгімелесіп, сайлауалды бағдарламаның басым бағыттары туралы мәлімет берді. Қала тұрғындары да түсіністік танытып, коммунистердің бастамасын жылы қабылдап жатыр. Бұған қоса партияның жас мүшелері Бүкіләлемдік темекі шегуге қарсы күнді елеусіз қалдырмай, «Біз темекі шегуге қарсымыз» атты акция өткізді. Осы шараның аясында саламатты өмір салтын қалыптастыруға атсалысып жүрген Ж.Ахметбековтің кандидатурасын қолдауға үндеді. Елордалық қоғамдық штабтың өкілдері көпшілікке партия журналының соңғы нөмірінде жарық көрген материалдарды көрсетті. Онда сайлауалды науқанда атқарылған іс-шаралар туралы толыққанды баяндалған.
* * *Nur Otan партиясынан президенттікке кандидат Қасым-Жомарт Тоқаевтың республикалық штабы аймақтарға сапарын осы аптада аяқтайды. Өңірлердегі кездесулер легі Шығыс Қазақстан облысында түйінделмек. Кеше олар Өскемен қаласының жұртымен кездесу өткізді. Облыстық драма театрда 500-ден аса адам жиналып, онда Елбасы ұсынған кандидаттың сайлауалды бағдарламасының басымдықтары түсіндірілді.
Күн тәртібіндегі басты мәселелердің бірі – экология. Бұл – Шығыс Қазақстан облысының тұрғындары үшін өте өзекті проблема. Өскеменде атмосфераға шығарылатын зиянды қалдықтар өткір мәселе екені жасырын емес. Оның үстіне Семей – ядролық полигонда жүргізілген сынақтардан ең көп зардап шеккен аймақ. Штаб жетекшісі Мәулен Әшімбаев, кандидаттың сайлауалды бағдарламасында экологияны жақсарту мәселелеріне ерекше көңіл бөлініп отырғанын айтты.
«Қазақстан халқының денсаулығы әрқашан да бірінші орында. Осыған қатысты жұмыстар бірнеше бағыт бойынша жүргізіледі. Атап айтқанда, қоршаған ортаның қауіпсіздігін қамтамасыз ету үшін экологиялық заңнамаларды жетілдіріп, халықаралық стандарттарға сәйкестендіру көзделген. Сонымен қатар осындай проблемасы бар әр өңірде экологиялық ахуалды жақсарту бойынша жұртшылықпен бірлесіп, кешенді жоспар әзірленеді. Қ.Тоқаев өз бағдарламасында қоршаған ортаға зиянды қалдықтар шығаратын барлық ірі кәсіпорындар қалдықтарын азайтуы және тазартудың жаңа технологияларын енгізуі үшін нақты жоспар әзірлеуді міндеттейміз деп көрсетіп отыр», деді М.Әшімбаев.
Кездесу соңында қала тұрғындары Қ.Тоқаевтың сайлауалды бағдарламасында көрсетілген бастамаларға оң пікірлерін білдіріп, Елбасы Нұрсұлтан Назарбаев бағытының сабақтастығын жалғастыратын кандидатты қолдайтындарын жеткізді. * * * «Ұлт тағдыры» ұлттық-патриоттық қозғалысы атынан президенттікке кандидат ретінде ұсынылған Әміржан Қосановтың өңірлердегі сайлауалды қоғамдық штабтары белсенділік танытып, сайлау күні учаскелерде дауыс беру процесін қадағалайтын байқаушыларға семинарлар өткізіп жатыр. Соның бірі Нұр-Сұлтан қаласында ұйымдастырылып, республикалық штаб өкілдері бірқатар байқаушыға арнайы куәліктерін тапсырды. Байқаушылардың көпшілігі семинарлардан өтіп, құқықтары мен міндеттері, сайлау кезінде орын алуы ықтимал түрлі жағдайлардағы әрекеттері жайлы біліктілігін арттырды. Сайлау күніне дейін семинарлар тағы да өтеді. Осы іспеттес куәліктер бүкіл ел бойынша кандидаттың облыстық штабтарында да, мүдделі қоғамдық бірлестіктерде де беріліп жатыр.Сонымен қатар Шығыс Қазақстан облысында сайлау байқаушыларына арналған кезекті семинар-тренинг өтті. Кандидаттың облыстық қоғамдық штабында өткен іс-шараның модераторы және тренері Дос Көшім болды. Ол байқаушылардың құқықтары мен міндеттері туралы кеңінен түсіндірді. Бұған қоса Ә.Қосановтың сенім білдірілген адамы Семей қаласының жергілікті тұрғындарымен кездесті. Онда халыққа алдағы саяси науқанның маңыздылығына тоқталып, президенттіктен үміткердің басты ұстанымдары жөнінде әңгімелеп берді.
Насихатшылар тобы өңір-өңірде қызу жұмыс істеп, түрлі акциялар ұйымдастыруда. Белсенділер жергілікті тұрғындарға кандидаттың сайлауалды тұғырнамасында көрсетілген бағыттарды жан-жақты жеткізіп, үгіт материалдарын да кеңінен таратып жатыр. Бұл ретте қоғамдық штабтар әлеуметтік желілердің әлеуетін да тиімді пайдаланып, еліміздегі ең ірі саяси оқиғаның маңызын да арттыруда. Осындай шаралардың нәтижесінде Ә.Қосановқа қолдау білдірген халықтың қатары да арта түсті.
* * *«Ұлы дала қырандары» республикалық қозғалысынан президенттікке кандидат Сәдібек Түгел Атырау қаласында сайлаушылармен кездесу өткізді. Жайық жағасында орналасқан мұнайлы қаладағы кездесуде жазушы-журналист С.Түгел өзінің басты ұстанымдары көрініс тапқан сайлауалды бағдарламасы туралы баяндап берді.
«Атырау өңірі мұнайы және газымен ғана емес, елімізге әйгілі тарихи тұлғаларымен де танымал. Ұлттық құндылықтарды құрметтей білетін сіздердің алдарыңызда өзімнің сайлауалды бағдарламамда атап көрсетілген басты міндеттерге тоқтала кетейін. «Ұлы дала қырандары» қоғамдық бірлестігінің атынан сайлау додасына түсіп отырмын. Ешқандай партияда жоқпын, ана тілімнің мәртебесін көтеру мақсатында барлық жерде мемлекеттік тілде сөйлеймін. Біздің қозғалыстың негізгі мақсаты – ұлттық құндылықтарды ұлықтау, Ұлы дала мәдениетін жаңғырту, халықты бірлікке, ынтымаққа шақыру. Негізгі ұстанымдарым: ұлағатты ұрпақ – ұлттық ұстаным, ауыл – алтын бесігіміз, жемқорлыққа тосқауыл қою, жер – жанымыз, тіл – тұғырымыз. Біздің жеріміздің асты мен үстіндегі барлық қазба байлық – халқымыздың төл меншігі. Сол байлықтан түскен пайда әрбір азаматқа тиесілі болуы қажет. Ұрпағымызға таза су мен ауаны, таза экологияны қалдыруға тиіспіз», деді президенттіктен үміткер.
Кандидаттың сенім білдірілген адамдары Ынтымақ Құлтасов, Клим Губашев және Асан Қарамоншақов сөз алып, оның бағдарламасындағы ел болашағын айқындауға қажетті басым бағыттарға тоқталды. Сонымен қатар «Ұлттық құндылықтарды ұлықтаймыз!» атты қолөнершілер көрмесі ұйымдастырылды. Жиналғандар алдында домбырашы Тұрлан Бисембаев, суретшілер Лаура Тілекбай, Мұрат Ерғалиев шеберлік сабақтарын өткізді.