Еліміздегі ең ірі саяси науқанның заң талаптарына қаншалықты сай өткендігі жайында пікір алмасқан жиынды ұйымдастыруға «Заңгерлер әділ сайлау үшін» республикалық қоғамдық бірлестігі мұрындық болды. Отырысқа танымал заңгерлер, заң ғылымдарының докторлары мен кандидаттары, еліміздің алдыңғы қатарлы жоғары оқу орындарының профессорлары, сондай-ақ мемлекеттік органдардың, үкіметтік емес ұйымдардың және елшіліктердің өкілдері қатысты.
Алқалы жиында сөз тізгінін заң ғылымдарының кандидаты, Қазақстан Заңгерлер одағының және «Заңгерлер әділ сайлау үшін» РҚБ төрағасы Серік Ақылбай ұстады. Ол еліміздің барлық 17 өңірінде 3 мыңға жуық заңгер сайлау учаскелеріндегі жағдайға мониторинг жүргізгенін айтып, аймақтардағы өкілдердің алдын ала бағалауы бойынша Президент сайлауы сайлау заңнамасының талаптарына сәйкес өткенін мәлімдеді.
– Біздің ұйым әр сайлауға қатысып келеді. Ұйымның басты міндеті – сайлау комиссиясының қызметін бағалау емес, кеңес беріп, көмектесу. Біз сайлаушыларға өз құқықтарын егжей-тегжейлі түсіндіруге баса мән береміз. Егер әр сайлаушы өз құқын біліп тұрса, онда сайлау ашық, әділ әрі таза өтеді. Сондықтан біз сайлаушылардан келіп түскен сұрақтарға толыққанды жауап беру үшін бес рет баспасөз жиынын өткіздік. Сұрақтар көбіне интернет арқылы қабылданды. Жалпы, бұрынғы сайлауларға қарағанда бұл жолы сайлаушылардың белсенділігі артып, өз құқықтарын әжептәуір біліп қалды, – деді Серік Ақылбай.
Басқосуда қоғамдық бірлестіктің заңгерлері сайлау, сайлау процесі және заңнама мәселелері бойынша баяндамалар жасады. Олардың ішінде заң ғылымдарының докторы, профессор Марат Сәрсембаев Еуропадағы қауіпсіздік және ынтымақтастық ұйымына қарасты Демократиялық институттар және адам құқықтары жөніндегі бюросының Президент сайлауы туралы мәлімдемесіне заң тұрғысынан баға берді. Ал заң ғылымдарының докторы, профессор Сергей Ударцев сайлау құқығының дамуына әсер ететін факторлар жөнінде сөз қозғады. Сонымен қатар М.Нәрікбаев атындағы ҚазГЗУ-дың қылмыстық сот төрелігі және ғылыми-құқықтық сараптама мәселелері бойынша ғылыми жобалардың жетекшісі Марат Қоғамов «Сайлау заңнамасы: тиімділік мәселелері, теория және практика» атты тақырыпта баяндама жасады. Бұған қоса Л.Н.Гумилев атындағы Еуразия ұлттық университеті заң факультеті деканы Сәуле Амандықова ел азаматтарының дауыс беру құқығын толық қолдануы патриотизмнің бір көрінісі деген пікірін білдірді.
Келелі кеңеске қатысушы заңгерлер іс-шараны қорытындылап, көтерілген мәселелерді ескеріп, алдағы уақытта сайлау заңнамасын әрі қарай жетілдіру жөнінде ұсыныстарын жеткізді.