Ал жазғысы келетін, бірақ құдай бір түйір талант бермегендер іштегі запыранын шығару үшін әжетхана қабырғасын шималайды екен. Бүгінде сол «жазғыштардың» әлеуметтік желіні жаулап алғанына қынжылады ақын.
Даңқы өз республикамыздан асқан, бірталай мемлекеттер тұтынып отырған «Аралтұз» жайындағы дақпырт әлеуметтік желі арқылы жұртшылықты бір сілкіндіргені белгілі. Оған себеп, Байқоңыр тұрғынының WhatsApp әлеуметтік жүйесі арқылы жариялаған видео мәтіні. Ол «қытай инвесторлары «Аралтұз» АҚ-ын сатып алды. Енді қытайлықтар тұзға улы химикаттар қосып, жүз жылда қазақ халқының тұқымын тұздай құртады» деп «жанайқайын» салады.
Онсыз да Қытай десе үркектеп жүрген халық мынадай мәлімдемеден кейін қалай жайына қарап жатады. Белсенділері аттанға ойбай қосып жұртты дүрліктіреді.
Осыған байланысты Қызылорда қаласында Өңірлік коммуникациялар қызметі алаңында өткен брифингте «Аралтұз» АҚ вице-президенті Нағашыбай Әуезханов өнім сапасы туралы айтып, Байқоңыр қаласы тұрғынының «Аралтұз» кәсіпорнын қытайлық инвесторлар сатып алып, кәсіпорын өніміне улы заттар қосады екен делінген қауесетті жоққа шығарды. Брифингке «Аралтұз» АҚ вице-президенті Нағашыбай Әуезханов, облыстық индустриалды-инновациялық даму басқармасы басшысының м.а. Жанар Берденова және Қызылорда облысы полиция департаменті бастығының орынбасары Байгелді Байжан қатысты.
– «Аралтұз» – Қазақстан мен басқа да бірқатар елдерді өз өнімдерімен қамтамасыз ететін бірегей кәсіпорын. Қазір кәсіпорында 1200-ден астам адам жұмыс істейді. Тұзды тазалау және өңдеу бойынша барлық жұмыстар талаптарға сай жүргізіледі. Бізде өнімнің сапасын бақылауға арналған арнайы зертхана бар, сондықтан, біздің тұз жоғары сапалы деп сеніммен айта аламын, – деді «Аралтұз» АҚ вице-президенті Нағашыбай Әуезханов.
Қызылорда облысы полиция департаменті бастығының орынбасары Байгелді Байжан бейнеүндеудің авторы өз әрекетін мойындағанын және бейнежазба жариялауға оның көрген түсі негіз болғанын айтты.
Оның мәлімдеуінше, жалған ақпаратты таратқан азамат ұсталған. Сөйтсе ол жазған түс көрген, түсінде жаман іс көрген екен. Көрген түсі мазасын ала бергеннен кейін халықты құтқармақ ниетте ойын әлеуметтік желіде айтып жіберген. Әрине, жалған ақпарат бергеніне өкінеді, кешірім сұрайды. Бірақ медальдің екі беті бары секілді, қалың елді дүрліктіру тек кешірім сұраумен бітпесе керек. Егер әркім сол жамбасымен жатып жайсыз түс көріп, оны жаһанға жар салып жариялайтын болса обалы кімге?! Бүгінде әртүрлі жағдайлар титығына жетіп, сіріңке тартса қурайдай лап етуге дайын топтар бар. Қит етсе елді ереуілге бастауға дайын, мемлекеттің іргесін шайқауға әбден бекінген қарсы күштер де бар. Мұндай жағдайлар олардың қолайына жағатындығы сөзсіз.
Бүгінде түс көріп, жалған ақпаратты таратқан азамат қылмыстық жауапкершілікке тартылды. Осындай даурықпаға құмар жандарға сабақ болса, қанеки.
Қызылорда облысы