Ауыл әкімі жеңе ме, судьяның әйелі жеңе ме?

Ауыл әкімі жеңе ме, судьяның әйелі жеңе ме?

Сейсенбі, 12 наурыз 2013 7:21

Қарапайым халыққа бермеген жерді билік өкілінің әйелі иемденіп отыр

Тұрар Рысқұлов аудандық соты судьясының әйелі мен осы ау­­данның орталығы – Құлан ауы­лы­ның әкімі соттасып жатыр. Өзін кәсіпкермін деп таныстырған Ораз­күл Мірқалықова, яғни судьяның әйелі жергілікті билік өкілін «базар алдындағы жерді кәсіпкерлік мақсатта пайдалануға бермегені үшін» сотқа берген. Бірақ ауыл әкімі Әлік Бектұрсынов болса: «Су­дья­ның әйелі жалған құжат жасап алу арқылы жаяу жүргіншілерге арналған жол жиегінен сауда нысанын ашып алған», дейді.

Сейсенбі, 12 наурыз 2013 7:21

Қарапайым халыққа бермеген жерді билік өкілінің әйелі иемденіп отыр

Тұрар Рысқұлов аудандық соты судьясының әйелі мен осы ау­­данның орталығы – Құлан ауы­лы­ның әкімі соттасып жатыр. Өзін кәсіпкермін деп таныстырған Ораз­күл Мірқалықова, яғни судьяның әйелі жергілікті билік өкілін «базар алдындағы жерді кәсіпкерлік мақсатта пайдалануға бермегені үшін» сотқа берген. Бірақ ауыл әкімі Әлік Бектұрсынов болса: «Су­дья­ның әйелі жалған құжат жасап алу арқылы жаяу жүргіншілерге арналған жол жиегінен сауда нысанын ашып алған», дейді. Судьяның әйелінің саудасы тиімді жерден ойып тұрып орын алып алуы, жергілікті кәсіпкер-саудагерлердің де наразылығын туғызуда.

Мәселенің мәнісін айтсақ, осы­дан екі жыл бұрын жергілікті билік­тің шешімімен аудандағы орталық базардың алдындағы сау­да нысандары жолды кеңейту мақсатында көшірілген. Бұл, әрине, өз кезегінде сауда-саттық иелерінің қарсылығын туғызғанымен, елге ортақ тәртіпке бағынып, «құтты орындарын» тас­тап, кете барған. Бірақ, өкінішке қарай, аз уақыттан кейін әлгі «жол­ды кеңейту мақсатында» боса­тылған жерде сауда нүктелері қай­та­дан бой көтере бастайды. Оның жаңа қожайыны Тұрар Рыс­құ­лов аудандық сотының судьясы Дүйсен Мірқалықовтың әйе­лі Оразкүл Мірқалықова болып шы­ғады. Жергілікті биліктің айтқа­ны­на көніп, тып-тыныш «қоныс аударған» кәсіпкерлердің ашу-ызасын туғызып отырған да «қолыңнан келсе, қонышыңнан бас», дегенге келетін осы жағдай.

Орынгүл ҚОЖАНАЗАРОВА, саудагер:

– Судья осы Құлан ауылында тұрады. Дүйсен Мірқалықов деген кісі. Біз сауда нүктелерімізді тастап, жерді босатып кеткеннен кейін ол осы жерге тас қалап, дүкен соқты. Сонда біз сияқты қарапайым халыққа келгенде рұқсат болмайды да, судьялардың отбасына рұқсат бола бере ме?

Аудандығы орталық базардың бастығы да судьяның зайыбынан жапа шегіп отырғанын айтады.

Ерлан СҮЛЕЙМЕНОВ, «Құлан» орталық базарының бастығы:

– Судьяның әйелі менің жерімді де алып қойып отыр. Заңды, «гос­актісі» бар, жекеменшік телімімді «судьямын», «судьяның әйелімін» деп, тартып ала бере ме?

Дауға себеп болған дүкеннің жа­ны­нан ұзындығы – 85, ені – 12 метр­лік жер тегістеліп, тағы бір жаңа нысан бой көтермек көрінеді. Оның да иесі кәсіпкер Оразкүл Мір­қалықова болмақшы. Бірақ ол да айылын жияр емес. «Құжаттарым заңды», дейді.

– Менің де заңдастырған құ­жат­тарым бар. Жұмыс істеп жатқаныма 2 жыл болды. Өзім зейнеткермін. Тірлік жасайын деген ниетім ғой, құжаттарым түгел.

Әлік БЕКТҰРСЫНОВ, Құлан ауылдық округінің әкімі:

– Бұл кісіге «сіздің жасап жат­қаныңыз заңсыз» деп талай рет айттық. Бірақ өзіне «бутик» салу үшін берілген орыннан басқа жерге, яғни қалаған жеріне «ту тігіп» отыр. Қолында құжаттары болғанымен, мына салынған «бутигінің» құ­жат­тары дұрыс емес.

Байсұлу Айнабекова, саудагер:

– Мына дүкенді аудандық сот­тың судьясы Дүйсен Мірқалықов деген кісі салдырды. Ал біз болсақ бұл жерге сауда-саттық жасауға бол­майды деген соң сол жердегі буд­каларымызды алдық та кеттік. Ендеше заңды орындауды талап ететін соттың судьясы сол заңсыз де­ген жерге неге дүкен салдырып отыр? Міне, сол үшін ашынып, шырылдап отырмыз.

Тұрар Рысқұлов ауданының бір топ саудагерлері қазір тиісті орындарға шағымдануда. Бірақ ауыл әкімі жеңе ме, судьяның әйелі жеңе ме, ол жағы әзірге белгісіз.

Көсемәлі Сәттібайұлы,

«Егемен Қазақстан».

Жамбыл облысы,

Тұрар Рысқұлов ауданы,

Құлан ауылы.