Шайбалы хоккейден Қазақстанның ұлттық құрама командасы Оңтүстік Кореяға қарсы өткізген үшінші жолдастық кездесуде айқын жеңіске қол жеткізді.
Айтулы бәсекеде жерлестеріміз қарсыластарына бас көтерткен жоқ. Бірінші кезеңде кореялықтардың қақпасына жауапсыз төрт шайба салдық. Бұл голдардың авторлары – Кирилл Балдин (7-минут), Артем Игнатенко (8-минут), Сергей Банашков (14-минут) және Данияр Ғабдуллин (18-минут). Одан кейін Никита Карпасов (35-минут), Мақсат Ыбыраев (39-минут) және Павел Жилин (45-минут) нысанан дәл көздеді. Қарсы жақ бір ғана гол соғуға жарады. Қорытынды есеп – 7:1.
Естеріңізге сала кетейік, қос команда арасындағы алғашқы екі матч Оңтүстік Корея құрамасының пайдасына шешілген еді. Бұл кездесулерде 4:5 және 4:7 есептері тіркелді. Алдағы уақытта олар тағы екі рет өзара күш сынасады.