Кеше Мексика мен Гаити құрамалары күш сынасты. Ацтектер елі өкілдері өте қарулы команда болғанымен, аралдықтар оларға лайықты қарсылық көрсетті. 90 минутқа созылған матчта қос команда бір-бірінің осал тұсын таба алмады. Десек те қосымша уақыттың үшінші минутында Гаитидің қақпасына 11 метрлік айып добы белгіленіп, оны Рауль Хименес мінсіз орындады – 1:0.
Бүгін АҚШ пен Ямайка шеберлік байқасты. Бұл бәсекеде алаң иелерінің үстемдігі еш күмән туғызған жоқ. Есеп – 3:1. Америкалықтар сапынан Кристиан Пулишич дубль авторы атанса, Уэстон Маккенни бір гол соқты. Ямайкалықтар қатарынан Николсон допты торда тулатты.
Сөйтіп, 8-шілде күні Нұр-Сұлтан уақыты бойынша сағат 7:00-де КОНКАКАФ кубогы жолындағы жарыстың бас жүлдесін Мексика мен АҚШ футболшылары өзара сарапқа салады.