«Шығармашылық мүмкіндіктер әлемі» атты республикалық фестиваліне еліміздің халықаралық, республикалық, облыстық байқаулар мен фестивальдардың лауреаттары, дипломанттары, жас әншілер, бишілер, шығармашылық ұжымдар мен оқу озаттары жиналды.
Сегізінші ауысымда «балдәурендік» балалардың шығармашылық қабілеттерін жандандыру және дамыту мақсатында «Шабыт» шығармашылық байқауы, «Екі жұлдыз» жобасы және «Күмбірле, сазды домбыра» музыкалық-танымдық кеші, «CreativeFEST» competition байқауы мен көптеген қызықты іс-шаралар өткізілді.
«Балдәуренде» жыл сайын ұлттық құндылығымызды дәріптейтін, асыл мұраларымызды, салт-дәстүрімізді дамыту мақсатында әртүрлі тақырыптық ауысымдар өткізіліп отырады. Ендеше, аталған ауысымда өткізілген іс-шаралардың бірі ретінде Ұлттық домбыра күніне арналған «Күмбірле, сазды домбыра» музыкалық-танымдық кеші туралы айтуға болады.
Төл өнерімізді дамытуға арналған кеш ауысымға жиналған өнерлі балалардан құралған «Балдәурен» оркестрінің орындауындағы Құрманғазының күйі «Балбырауынмен» ашылды. Бұл кеш асқақ жыр, сұлу сырлы күй, қанатты шешендік сөз, ұлағатты терме сынды тұнба бұлақтай төл өнерімізді насихаттап, тілімізді, ділімізді жандандырып, өнер құдіреті – домбыраның үкісін желбіретіп, асқақтатты.
Іс-шара барысында еліміздің дарынды, шығармашыл балалары өз өнерлерін көрсетіп қана қоймай, ұлттық өнерімізге байланысты танымдық сұрақ-жауаптарға белсенділікпен қатысты. Кеш соңында балалар арнайы сыйлықтармен, грамоталармен марапатталды.
Айнұр ЕРДЕНОВА,
«Балдәурен» РОСО баспасөз хатшысы