Тасқыннан кейінгі тіршілік біртіндеп түзеліп келеді
Халқымыздың “Басыңа іс түссе, жақсы көмек етеді, жаман күліп кетеді” деген сөзіне Қызылағашта болған кешегі күні тағы бір көз жеткіздік. Баршаның назарын аударған тасқыннан болған зардапты жою мен қалпына келтіру, жапа шеккен тұрғындарға материалдық көмек көрсету, азық-түлікпен қамтамасыз ету шарасының деңгейі құптарлық деуге болады. Елбасының тікелей тапсырмасымен қайырымдылық шаралары жедел басталғандықтан әр өңірден есеп-шотқа қомақты қаржы түсуде. Қызылағаштықтарға қолұшын созған ақтөбеліктер 120 млн. теңге аударса, өзге де өңірлерден 50 млн. меңге қаржылай көмек көрсету шешімін табуда. Аталған елді мекенде халықтың еңсесін көтеруді мақсат еткен қайырымдылық көмектері мен шаралар легі толастамауда.
Тасқын зардаптарын жою, қираған үйлердің орнын тазарту, тағы басқа жұмыстар қарқын алғанын көрдік. Бұрынғыдай емес, тіршілік ырғағы түзеліп, бүлінген, бірақ ілдалдалап тұруға болатын баспаналар ретке келтіріліп, 247 отбасындағы 771 адам ауылға қайта оралды. Олар құтқарушыларға көмек көрсетіп, жұмыла жұмыс істеуде. Үйлері тұруға келмейтіндер орта мектеп ғимараты мен әрқайсысы он адамға арналған арнайы тігілген шатырларға орналастырылуда. Балалардың оқуы жалғасуда. Осылайша Қызылағашта шатырлы қалашық орнап, тірліктің тамырына қан жүгірген.
Атқарылған жұмыс күн сайын кешкісін қорытындыланып, қалпына келтіруге қатысушы мекеме, ұйым басшылары есеп беріп, алдағы жұмыстардың жоспары жасалуда. Жиында облыс әкімі Серік Үмбетов сала басшыларынан зардапты жою мақсатындағы атқарылған және шешімін табуға тиісті мәселелерді, мемлекет тарапынан бөлінген және халықтан түскен қаражатты мақсатты жұмсап, апат зардаптарын тез арада жою мен тұрғындардың тірлігіне ерекше назар аудару қажеттігін нақтылады.
Қазіргі кезде ауылдағы аурухана, мектеп, әкімдік үйі, байланыс бөлімшесінің ғимараттары тазаланып, қуат көзімен, телефон желісімен қамтылған. Осы күні “Қазпошта” ғимаратында мекендеріне оралғандарға зейнетақылары берілсе, қалғандарының құжаттарын тез арада заңдастыру тапсырылды. Үкіметтен, облыс әкімдігінен берілуге тиісті қайырымдылық қаражатын алу мақсатындағы тіркеу жалғасуда. Елді мекенде 500 нөмірлік телефон стансасы іске қосылғаны, халыққа ауыз су арнайы он автомәшинемен тасымалданатыны да айтылды. Құрылыс материалдары біртіндеп жеткізіліп, құрылысшылар тазалау жұмыстарымен айналысуда. Тұрғын үй салуға қажетті кірпіш жеткізілуде.
Облыстағы денсаулық сақтау, ішкі істер департаменті мен төтенше жағдайлар қызметінен кезекшілік ұйымдастырылып, құтқарушылар мен тұрғындар асханада үш мезгіл ыстық тамақпен қамтылыпты. Тасқын салдарынан Талдықорғандағы ауруханаға түскендер емделіп шығуда. Зардап шеккендерді дәрі-дәрмекпен қамтамасыз ету, басқа да көмектер көрсету әлі де жалғасуда.
Түйінді мәселе құрылыс материалдарын жеткізудегі темір жол қатынасын тез арада ретке келтіру болып отыр. Сарыөзек пен Үштөбе, Ақтоғай мен Үштөбе арасындағы шойын жолды қалпына келтіру жұмыстары созылатынын жеткізген сала басшысы құрылыс материалдарын Алматы арқылы Сарыөзекке жеткізіп, автокөлікпен тасымалдаудан басқа мүмкіндік жоқ екенін айтты. Сонымен қатар, Қызылағаштағы, Сағабүйендегі өткелдің ертең қалпына келтірілетіні, құрылысшылар жұмысы қарқын алғанымен, үздіксіз жауған жаңбыр қолбайлау болғаны да сөз болды.
Қызылағаштың тірлігін жаңа арнаға түсіретін құрылыс жұмыстары. Бүгінде онымен айналысатын құрылыс компаниялары жұмыстарын бастауға әзір. Ал, тұрғындар ынтасы да жақсы. Олар үйлерінің орнын тазалап, өз көмектерін көрсетуде.
– Жұмыла көтерген жүк жеңіл. Халықтың сабырлылығына, бүгінгі ниетіне рахмет. Елбасының тапсырмасымен жасалған қолдау нәтижесінде әр облыстан қаржылай, заттай көмектер келсе, жеке адамдардың, ұйымдардың қолұшын беруі де жақсы. Өңірлеріндегі қиындыққа қарамастан Шығыс Қазақстан облысы 50 млн. теңгемен қоса жаңа он үй салып беретіндіктерін айтып отыр. Мұндай ұсынысты маңғыстаулықтар білдірсе, атыраулықтардың жанар-жағармаймен көмек көрсету мақсатындағы бастамасы да қуантады. Жалпы, Қызылағаштағы жағдай баршаны алаңдатқанын жасыруға болмайды. Осы көмектердің жіп-шырғасын шығармай пайдалану керек. Болмаған жағдайда еш кешірім жасалмайтынын тапсырған облыс әкімі құқық қорғау органдарына оны қадағалауды міндеттеді.
Апатты жағдайды басынан өткергендер арнайы құрылған қоғамдық кеңес мүшелері арқылы жағдайларын шешу үстінде. Бұл жолы тұрғындар жеке мәселелерінен гөрі ауыл тұрғындарының ертеңгі күніне байланысты ойларын ортаға салды. Қызылағаштық Дәуітхан Керімовтің пікірі құптарлық.
Бізге жасалған қайырымдылық шараларына да, көмекке де ризамыз. Бірақ, мемлекет 3 ай асырайды деп қарап отырсақ, алдағы қыста қысылатынымыз анық. Бұрынғы егістік алқаптарына су жайылып, жарамсыз күйде. Бізге басқа жер бөлініп, тұқыммен қамтамасыз етілсе, алдағы қысқа дайындықты өзіміз жасап алар едік. Мамандығым агроном, жұмыстың ретін білемін, дейді. Шаруа қожалықтарының көктем егісіне дайындаған тұқымдарын су шайып құр-алақан қалғаны да сөз болды. Осындай мәселені жергілікті тұрғын Александр Квитко да баяндап, ауылдастарының өміріндегі кейбір тұстарды атап айтты. Облыс әкімі сауалдарға назар аударумен қатар жер қорынан егістік алқабын қарастыру, тұқыммен қамтамасыз ету мәселесін сала басшыларына міндеттеуді өзі де қадағалап, шешетінін жеткізді.
Ауыл тұрғындарының тілегі бойынша сауда орнын ашу, монша, тағы басқа тұрмыстық қажеттіліктердің тез арада шешілуі күн тәртібіне қойылды. Осы күні апат орнын тазалау кезінде екі адамның мәйіті табылды.
Қызылағаштан алыстағанда әр үйдегі электр жарығы самаладай жарқырап, мұндағы тірліктің сәл де болса түзелгенінің дәлеліндей көрінді.
Күмісжан БАЙЖАН, Алматы облысы.